Таъкидланишича, АҚШ Давлат департаменти қонуний иммиграцияни қатъийлаштиришга қаратилган кенг кўламли кампаниянинг бир қисми бўладиган ташаббусни ишлаб чиқмоқда. Асосий мақсад — молиявий имконияти чекланган шахсларнинг мамлакатга киришини чеклаш ва янги иммигрантларнинг давлат нафақаларига таянмасдан, ўзини ўзи таъминлай олишини кафолатлашдир.
100 минг долларлик гаров, катта эҳтимол билан, қайтариладиган бўлади — агар ариза берувчи бир неча йил давомида “жамиятга юк” (public charge) бўлмаса, маблағлар унга қайтариб берилади. Бироқ, бундай шартнинг ўзиёқ бу режани ўта қатъий тўсиққа айлантиради.
Ташаббус муаллифларининг фикрича, бундай чоралар АҚШ ижтимоий тизимига тушадиган юкни камайтиришга ва америкалик солиқ тўловчиларнинг манфаатларини ҳимоя қилишга ёрдам беради.
Ҳозирча таклиф муҳокама босқичида турибди. Танқидчилар уни аллақачон камситувчи ва ривожланаётган мамлакатлардан келган иммигрантларга қарши қаратилган деб атамоқда. Қатъий миграция сиёсати тарафдорлари эса, аксинча, бу ғояни Америка иқтисодиётини ҳимоя қилиш йўлидаги мантиқий қадам сифатида олқишламоқда.
Экспертлар якуний қарор яқин ойларда қабул қилиниши ва АҚШ иммиграция тизимини комплекс ислоҳ қилишнинг яна бир унсурига айланиши мумкинлигини таъкидламоқда.
