Россия Давлат думаси томонидан қабул қилинган қонунга кўра, судланганлиги олиб ташланмаган ёки қонуний тартибда бекор қилинмаган яна бир қатор шахслар мамлакат Қуролли кучлари билан ҳарбий хизмат шартномасини тузиши мумкин бўлади.

Ҳужжат Россия парламентининг расмий сайтида эълон қилинди.

Қандай жиноятлар бўйича маҳкумлар қамраб олинади?

Янги қонун қатор оғир жиноятлар учун судланган шахсларга нисбатан ҳам амал қилади.

Жумладан, қуйидаги моддалар бўйича маҳкумлар армия билан шартнома тузиш ҳуқуқига эга бўлади:

  • нақд пул, наркотик моддалар, қурол-яроғ, портловчи моддалар, ядровий материаллар ва хавфли биологик агентлар контрабандаси;
  • қўриқланадиган объектларга ноқонуний кириш;
  • ёқилғи-энергетика инфратузилмаси хавфсизлигини бузиш;
  • ядровий материаллар билан қонунга зид муомала қилиш;
  • ядровий материалларни ўғирлаш.

Шунингдек, қонун қуйидаги жиноятлар учун маҳкум этилганларга ҳам татбиқ этилади:

  • бандитизм;
  • жиноий уюшма ташкил этиш ёки унда иштирок этиш;
  • ноқонуний миграцияни ташкил этиш;
  • давлат сирига оид ҳужжатларни йўқотиш.

Россиянинг «Интерфакс» агентлиги маълум қилишича, мазкур ҳужжат Жиноят кодексининг 78¹-моддасига ўзгартиш киритиш тўғрисидаги қонун билан бир пакетда қабул қилинган.

CSIS: Россиянинг йўқотишлари кескин ошган

Шу билан бирга, Вашингтондаги Стратегик ва халқаро тадқиқотлар маркази (CSIS) таҳлилчилари Россия армияси 2026 йилда Украинада анча катта йўқотишларга учраётганини қайд этди.

Тадқиқотга кўра, 2026 йилда Россия Қуролли кучлари ҳарбий хизматчиларини Украина армиясига нисбатан саккиз баробар кўпроқ йўқотмоқда.

CSIS ҳисоб-китобларига кўра, 2022 йил феврал ойида уруш бошланганидан буён икки томоннинг умумий йўқотишлари икки миллион нафарга яқинлашган.

Шундан тахминан 1,4 миллион нафари Россия, қолган қисми эса Украина томони ҳисобига тўғри келади.

Таҳлилчиларнинг таъкидлашича, агар аввал Россия ва Украина йўқотишлари нисбати одатда 2:1 ёки 3:1 атрофида бўлган бўлса, 2026 йилнинг биринчи ярмида бу кўрсаткич 8:1 гача ошган.

Марказ маълумотларига кўра, Россия армияси йўқотишларининг 90 фоиздан ортиғи тўғридан тўғри жанговар тўқнашувлар эмас, балки Украина дронлари зарбалари ҳисобига тўғри келмоқда.