АҚШ Қуролли кучлари Марказий қўмондонлиги (CENTCOM) 30 июл куни Эрон ҳудудидаги бир қатор ҳарбий нишонларга оммавий зарбалар берилганини маълум қилди.
Қўмондонликка кўра, ҳужумлар бир кун аввал минтақада жойлашган АҚШ ҳарбийларига қарши амалга оширилган ракета ҳужумига жавоб тариқасида уюштирилган.
CENTCOM билдиришича, операция давомида Эрон Ислом инқилоби муҳофизлари корпусига қарашли ўнлаб объектлар, жумладан ҳарбий қўмондонлик марказлари, ракета қуроллари ва учувчисиз аппаратлар билан боғлиқ иншоотлар, шунингдек соҳил қўриқлаш кучлари объектлари нишонга олинган.
Америка ҳарбийлари таъкидлашича, операциядан асосий мақсад Эрон ва унинг иттифоқчилари томонидан АҚШ қўшинлари, Форс кўрфазидаги тижорат кемалари ҳамда минтақа давлатларига таҳдидларни янада камайтиришдан иборат бўлган.
CENTCOM маълумотига кўра, 28 июл куни корпус Эрон ҳудудидан Яқин Шарқдаги Америка ҳарбийларига қарата бир нечта баллистик ракета учирган. АҚШ томони бу ракеталарнинг барчаси ҳавода йўқ қилинганини билдирмоқда. Айни пайтда Яқин Шарқда 50 мингдан ортиқ америкалик ҳарбий хизмат қилмоқда.
АҚШ ва Эрон ўртасидаги қуролли қарама-қаршилик 12–24 июл кунлари давомида ҳам юқори даражада кечган эди. Бу даврда АҚШ Эрон ҳудудидаги ҳарбий объектларга тунги ҳужумлар уюштириб, уларни Ҳўрмуз бўғозидаги тижорат кемаларига таҳдидни камайтириш чораси сифатида изоҳлаган. Эрон эса қўшни давлатлардаги АҚШ ҳарбий базаларини нишонга олганини маълум қилган.
24 июлдан кейин томонлар бир неча кун давомида ўзаро зарбаларни тўхтатиб турган. The New York Times маълумотига кўра, АҚШ президенти 24 июл куни янги кенг кўламли ҳужумларни вақтинча кечиктиришга қарор қилган. Бунга ҳаво ҳужумидан мудофаа тизимлари учун ракета захираларининг қисқариши ҳамда эҳтимолий глобал энергетика ва иқтисодий инқироз хавфи сабаб бўлган.
Шу билан бирга, 28 июл кунги ҳужумларда АҚШ Саудия Арабистони қуролли кучлари билан биргаликда ҳаракат қилган. CENTCOM маълум қилишича, бу операция сўнгги 72 соат ичида АҚШ кучларига қарши уюштирилган 30 дан ортиқ дрон ҳужумига жавоб бўлган.
