1 август куни Москванинг Баррикада кўчасидаги кўп қаватли бино олдида портлаш рўй берди. Бу вақтда ушбу бинонинг биринчи қаватида жойлашган Balzi Rossi ресторанида хусусий маросим ўтказилаётганди. Сўнгги маълумотларга кўра, ушбу портлаш оқибатида беш киши ҳалок бўлиб, йигирмадан ортиқ киши яраланган. Портловчи қурилмани ресторанга курьер олиб келган, қўриқчи уни ичкарига киритмаган ва шундан кейин қурилма масофадан туриб портлатилган.
Москва шаҳри мэри Сергей Собянин ҳодисани теракт деб атаган, ҳукумат бу борада расман изоҳ бермаган, хусусан, теракт нишони ким экани маълум қилинмаган. Россиянинг Италиядаги элчихонаси эса бу ҳужумда Украинани айблаб, «Киевдаги террорчилар Россияда ишлаётган италияликларни қўрқитиб қўймоқчи бўлгани» ҳақида баёнот берди.
ОАВга маълум бўлишича, ресторанда бу вақтда РФ ҳаво-космик кучлари бошлиғи, генерал-полковник Александр Чайконинг туғилган куни ўтказилаётганди: 27 июл куни у 55 ёшга тўлганди, меҳмонлардан бири олган видеода ресторан саҳнасида «Александр 55 ёшда» ёзуви ўрнатилганини кўриш мумкин.
Balzi Rossi’даги зиёфат ҳарбий-космик кучлар бошлиғи шарафига уюштирилгани ҳақида ҳукумат таъсиридаги телеграм-каналлар ҳам ёзган. «Медуза» ушбу ҳужум нишони бўлган ва суиқасддан омон қолган генерал ҳақида ҳикоя қилди.
Александр Чайко Россиянинг Украина билан кенг кўламли уруши даврида суиқасд уюштирилган (агар ҳужум нишони чиндан ҳам у бўлса) энг юқори мартабали генераллардан бири бўлди. Чайко Ҳаво-космик кучларига 2026 йил майида бошлиқ этиб тайинланганди, аммо унгача ҳам РФ учун энг муҳим ва сиёсий аҳамиятга эга бўлган йўналишларда раҳбарлик лавозимларини эгаллаган: хусусан, Суриядаги ҳарбий амалиётни бошқарган, 2022 йил феврал-баҳор ойларида эса Россия қўшинларининг Киев областига юришига бошчилик қилган. Уни кўплаб ҳарбий жиноятларда айблашган, у Буюк Британия ва Евроиттифоқнинг санкциялар рўйхатига киритилган – шу билан бир вақтда Россия Қаҳрамони (2020 йилдан) ҳисобланади.
Сурия
РФ президенти матбуот хизмати
