Нашр маълум қилишича, «Адмирал Левченко» 31 июл куни Германиянинг Фемарн ороли яқинидан ўтган. Кемани немис журналисти соҳилдан туриб суратга олган. Шунингдек, 1 август куни Marineforum Online портали ҳам кеманинг Росток шаҳри шимолида сузиб кетаётгани акс этган суратни эълон қилди.
Россия расмийлари ҳозирча кеманинг Болтиқ денгизига кўчирилгани ва унга юклатилган вазифалар ҳақида маълумот бермаган. Бироқ Kieler Nachrichten таҳлилига кўра, «Адмирал Левченко» аввал Дания ва Германия ўртасидаги Фемарн-Белт бўғозида навбатчилик қилган шу тоифадаги «Североморск» кемаси ўрнини эгаллаши мумкин.
Россия томони илгари «Североморск» фуқаролик кемалари хавфсизлигини таъминлаш вазифасини бажараётганини билдирган эди. Немис нашри эса бу амалда Россия нефтини ташувчи ва халқаро санкцияларни четлаб ўтишда қўлланадиган «соя флоти» кемаларини қўриқлашни англатганини таъкидлайди.
Маълум қилинишича, «Североморск» июн ойи охирида «узоқ денгиз сафари вазифаларини якунлагани» сабабли Болтиқни тарк этган. Унинг кетишидан сўнг минтақада Россия Балтиқ флотига қарашли «Сообразительный» корветигина қолган эди. Энди эса унга ёрдам сифатида «Адмирал Левченко» юборилган.
Нашрнинг ёзишича, «Североморск» база портига қайтиш йўлида Германияда қурилган ва Россия президенти Владимир Путин билан боғлиқ деб ҳисобланадиган Graceful суперяхтасини ҳам кузатиб борган. Мазкур яхта 2022 йил феврал ойида, Россиянинг Украинага кенг кўламли босқини бошланишидан сал аввал, Ҳамбургдан Калининградга олиб кетилган эди. Шу йилнинг ўзида АҚШ уни Россия раҳбарияти билан боғлиқ актив сифатида санкциялар рўйхатига киритган.
ОАВ маълумотларига кўра, кейинчалик Graceful Калининграддан Мурманскка йўл олган. Расмий ҳужжатларда унинг манзили Истанбул деб кўрсатилган бўлса-да, йўналиш ўзгартирилгани яхтани Украина дронлари эҳтимолий ҳужумларидан ҳимоя қилиш мақсади билан изоҳланган.
