Ўзбекистоннинг қатор халқаро рейтинг ва индекслардаги кўрсаткичлари яхшиланмоқда. Бу ҳақда Халқаро рейтинг ва индекслар билан ишлаш бўйича республика кенгашининг навбатдаги йиғилишида сўз борди.
Йиғилишга Олий Мажлис Сенати раиси ва Республика кенгаши раиси Танзила Норбоева раҳбарлик қилди.
Таъкидланишича, жорий йилнинг ўтган даврида Ўзбекистоннинг бир қатор халқаро рейтинглардаги позицияси сезиларли даражада мустаҳкамланган. Хусусан, халқаро рейтинг агентликлари — Fitch Ratings ва S&P мамлакатнинг суверен кредит рейтинги кутилмасини «барқарор»дан «ижобий»га оширди. Moody’s эса Ўзбекистоннинг кредит рейтингини «Va3» даражасидан «Va2» даражасига кўтарди.
Иқтисодий эркинлик индексида Ўзбекистон 14 поғона юқорилаб, 184 давлат орасида 86-ўринни эгаллади. Мамлакат 60,3 балл билан илк бор «ўртача эркин» давлатлар қаторига кирди. Аввалги йилларда Ўзбекистон «асосан эркин бўлмаган» давлатлар гуруҳида қайд этилган.
«Аёллар, бизнес ва қонун» индексида ҳам сезиларли ўсиш кузатилди. Ўзбекистон 43 поғона кўтарилиб, 190 мамлакат орасида 48-ўринни эгаллади. Мамлакат гендер тенгликни таъминлаш ва аёлларнинг иқтисодий фаоллигини қўллаб-қувватлаш бўйича энг катта ҳуқуқий ислоҳотларни амалга оширган давлатлардан бири сифатида эътироф этилди.
Йиғилишда янги устувор йўналишлар бўйича халқаро рейтинглар билан ишлаш зарурати ҳам қайд этилди. Хусусан, сунъий интеллект ва рақамли технологиялар соҳасидаги натижаларни баҳоловчи индексларга алоҳида эътибор қаратиш таклиф этилди. Маълумотларга кўра, Oxford Insights ташкилотининг Ҳукуматнинг сунъий интеллектга тайёргарлик индексида Ўзбекистон 2020 йилдаги 95-ўриндан 2025 йилда 62-ўринга кўтарилган ва МДҲ ҳудудида энг юқори натижани қайд этган давлатга айланган.
Шу билан бирга, экологик йўналишдаги кўрсаткичлар таҳлил қилиниб, Атроф-муҳит самарадорлиги индексидаги натижалар муҳокама қилинди. Йел ва Колумбия университетлари томонидан шакллантириладиган мазкур индексда Ўзбекистон 2026 йилда 177 давлат орасида 121-ўринни эгаллаган. Бу кўрсаткич 2024 йилдаги 107-ўринга нисбатан пасайишни англатади.
Шу муносабат билан сунъий интеллектга тайёргарлик ва атроф-муҳит самарадорлиги индексларини устувор халқаро рейтинглар рўйхатига киритиш ҳамда улар бўйича тизимли ишларни кучайтириш тавсия этилди.
Йиғилишда, шунингдек, 2026 йил учун белгиланган чора-тадбирлар режасининг ижроси кўриб чиқилди. Муҳокамалар якунида Ўзбекистоннинг халқаро рейтинг ва индекслардаги ўрнини янада яхшилашга қаратилган қўшимча вазифалар белгиланди ва Республика кенгашининг тегишли қарори қабул қилинди.
