MonoVisions Photography Awards ташкилотчилари 2026 йилги танлов натижаларини эълон қилди. Якка фотосуратлар бўйича «Табиат ва ёввойи ҳайвонлар» (Nature and Wildlife) тоифасида биринчи ўрин АҚШ вакили Вэй Ляннинг «Бехато зарба» (Perfect strike) асарига насиб этди.

Суратда катта кўк қарқаранинг форел балиғини тутаётган лаҳзаси акс этган. Қушнинг қанотлари ҳали ёпилмаган, ўлжа атрофида эса сув томчилари сачрамоқда. Фотограф овнинг айнан шу қисқа лаҳзасини кадрга муҳрлаган.

Иккинчи ўринни АҚШнинг яна бир вакили Ливэн Таонинг «Нафосат!» (Grace!) сурати эгаллади. Кадр Антарктидадаги Гулд қўлтиғида, император пингвинларининг йирик колонияси орасида олинган.

Муаллифнинг айтишича, минглаб қушлар орасида унинг эътиборини бир вояга етган пингвин тортган. У камеранинг рўпарасида туриб, овоз чиқарган ва турли ҳолатларга кирган. Фотограф айнан пингвин бошини эгган пайтни танлаган.

«Пингвин бошини эгган лаҳза менга шу қадар нафис кўриндики, уни таърифлашга сўз тополмадим», — дейилади Таонинг суратга берган изоҳида.

Ливэн Тао яқинда касбий амалиётини якунлаган эндодонт, яъни тиш илдизи каналларини даволаш бўйича мутахассисдир. Фотография унинг ҳаётига тахминан ўн йил аввал дам олиш машғулоти сифатида кириб келган, кейинчалик эса асосий қизиқишига айланган.

Унинг таржимаи ҳолида қутб ҳудудларига алоҳида қизиқиши, шунингдек, оқ айиқларга бағишланган Yukio’s First Day Out номли болалар фотокитоби тилга олинади. Танловга тақдим этилган ишда фотограф бутун колониянинг кенг манзараси ўрнига битта пингвиннинг портретини кўрсатишни маъқул кўрган.

«Нафосат!» — MonoVisions 2026 танловининг «Табиат ва ёввойи ҳайвонлар» тоифасида иккинчи ўрин / © Liwen Tao

Учинчи ўрин колумбиялик фотограф Камило Диаснинг «Қулай фурсатда озиқланиш» (Opportunistic Feeding) асарига берилди. Унда сув юзаси яқинида озиқланаётган букри кит ва унинг атрофида тўпланган балиқлар тасвирланган.

Диаснинг тушунтиришича, сурат сардиналарнинг оммавий кўчиши пайтида олинган. Бир жойда тўпланган катта миқдордаги ўлжа денгиз қушлари, денгиз арслонлари, марлинлар ва тунецларни ҳам жалб қилган. Муаллиф озуқанинг бу қадар мўллиги китнинг ҳатто кўпайиш ҳудудида ҳам озиқланишига сабаб бўлганини таъкидлайди.