Андижон шаҳрида ўзаро жанжаллашиб, фуқароларнинг тинчлигини бузган 7 нафар аёлга беш суткадан маъмурий қамоқ жазоси тайинланди.
Маълум қилинишича, 30 июл куни шаҳардаги кўп қаватли уйлардан бирининг ҳудудида бир гуруҳ аёллар жанжаллашаётгани ҳақида 102 рақами орқали ички ишлар органларига хабар келиб тушган. Хабарга асосан воқеа жойига етиб борган ички ишлар ходимлари томонидан аёллар ўзаро бақир-чақир қилиб жанжаллашаётгани ҳамда атрофдаги фуқароларнинг осойишталигини бузаётгани аниқланган.
Улар ички ишлар биносига олиб келингач, бу ерда ҳам ходимларнинг қонуний талабларига бўйсунмасдан, ўзаро ҳақоратли ва уятли сўзлар билан жанжални давом эттирган.
Терговга қадар текширув давомида аниқланишича, жанжалнинг келиб чиқишига Instagram тармоғи орқали бошланган ўзаро ҳақоратлар сабаб бўлган.
Ҳолат бўйича тўпланган ҳужжатлар жиноят ишлари бўйича Андижон шаҳар судига юборилган.
Жиноят ишлари бўйича Андижон шаҳар судининг қарорига кўра, ҳуқуқбузарлик содир этган етти нафар аёлнинг ҳар бирига нисбатан беш суткадан маъмурий қамоқ жазоси тайинланган.
