Аргентиналик футбол юлдузи Лионел Мессининг отаси Хорхе Месси 68 ёшида ҳаётдан кўз юмди. Кўплаб нашрлар бу ҳақда Аргентинанинг infobae газетасига таяниб хабар бермоқда. Ҳозирча ушбу маълумот бўйича расмий тасдиқ бўлганича йўқ.
Маҳаллий матбуотга кўра, Хорхе Месси 8 августга ўтар кечаси соат 22 лар атрофида, Аргентинанинг Росарио шаҳридаги шифохонада вафот этган.
У охирги ойларда оғир касаллик билан курашиб келаётган эди.
Ўғли Лео июн ойида Жаҳон чемпионати илк турини Жазоирга қарши ўйинда учта гол билан бошлаган, ўйиндан кейин эса кўз ёшларини тия олмаган эди. Кичик Месси бу кўз ёшлари сабаби спорт эмас, бошидан кечираётган оғир кунлари билан боғлиқлигини айтганди.
Унинг отаси жиддий бемор экани ҳақидаги хабарлар ўшанда тарқала бошлаган, чунки Леонинг агенти бўлиб келган отаси Аргентина ўйинлари вақтида трибуналарда кўриниш бермаган эди.
Июн ойида Мессининг оиласи баёнот бериб, катта Месси ҳақиқатан ҳам даволанишда экани, лекин аҳволи яхши эканини маълум қилганди. Ўша баёнотдан бир кун олдин La Opinion нашри Хорхе Месси январ ойида оғир хасталикка чалингани, мундиал арафасида эса аҳволи оғирлашгани ҳақида ёзганди.
Лионел Мессининг футболдаги ютуқларида отасининг ҳиссаси жуда катта. У ўғлини кичик ёшидан футбол машғулотларига берган, 13 ёшлик пайтида “Барселона” академиясига ўқишга юборган.
Хорхе Месси узоқ йиллар давомида ўғлининг агенти сифатида фаолият юритиб келаётган эди.
