Адлия вазирлиги ташаббуси билан қабул қилинган идоравий ҳужжатга мувофиқ, банкларда нақд чет эл валютасини сотиб олиш тартиби соддалаштирилди.
Эндиликда фуқаролар 500 АҚШ долларигача бўлган миқдорда нақд чет эл валютасини шахсини тасдиқловчи ҳужжат тақдим этмасдан харид қилиши мумкин.
Бунга қадар банклардан паспорт ёки ID-картасиз сотиб олиш мумкин бўлган чет эл валютаси миқдори 100 АҚШ долларини ташкил этар эди. Янги тартиб билан ушбу миқдор беш бараварга оширилди.
Мазкур ўзгариш 2026 йил 8 майда 2886-12-сон билан давлат рўйхатидан ўтказилган идоравий ҳужжатда белгиланган бўлиб, у жорий йилнинг 9 августидан кучга кирди.
Адлия вазирлиги ушбу ўзгариш аҳоли учун банк хизматларидан фойдаланишни енгиллаштиришга қаратилганини маълум қилди.
