10–16 август кунлари қишлоқ хўжалиги учун яна юқори ҳарорат ва қуруқ об-ҳаво фони ҳукм суради. Айрим ҳудудларда +41…+43 даражагача кўтариладиган иссиқлик тупроқдаги намликнинг тез камайиши, суғоришга бўлган талабнинг ортиши ва экинлар учун физиологик стресснинг кучайишига олиб келиши мумкин.

Ҳафта охирида ҳароратнинг бироз пасайиши эса далалар учун қисқа муддатли енгиллик яратади.
Ҳафтанинг биринчи ярмида шаклланадиган кучли ва қуруқ иссиқлик аввало сув истеъмолини оширади. Тупроқ буғланишининг кучайиши суғориладиган майдонларда намлик захирасининг тез камайишига, айниқса, юзага яқин илдиз тизимига эга экинларда сув танқислиги стрессининг кучайишига сабаб бўлиши мумкин. Шунингдек, кучли шамол кузатиладиган ҳудудларда тупроқнинг қуриши ва чангланиши кучаяди.

Айни пайтда пахта, сабзавот, полиз ва боғларда сув таъминотини назорат қилиш, суғориш муддатларини ўсимликнинг физиологик эҳтиёжига мослаштириш муҳим. Куннинг энг иссиқ соатларида дала ишларини чеклаш нафақат экинлар, балки қишлоқ хўжалиги ходимларининг саломатлиги учун ҳам зарур.

Ҳафта охирида ҳароратнинг бироз пасайиши экинлар учун иссиқлик стрессини юмшатади. Бироқ ёғингарчилик бўлмаса бу совишни тупроқ намлиги тикланиши билан тенглаштириб бўлмайди. Шунинг учун ҳафта давомида қишлоқ хўжалиги учун асосий муаммо иссиқликдан кўра, ўсимликлардаги сувга бўлган талабини тез қондириш бўлади.