Рейтинг S&P Global Mobilityʼнинг 2026 йилги маълумотлари асосида тузилган бўлиб, улар Automotive News томонидан эълон қилинган. Статистика 2026 йил май ойига қадар амалга оширилган автомобил савдоларини қамраб олади.
Тадқиқотда «мижозлар садоқати» деганда автомобил эгасининг транспорт воситасини алмаштириш вақтида, аниқ моделидан қатъи назар, яна ўша бренд автомобилини харид қилиши тушунилади.
Умуман олганда, автомобил ва электромобил харидорларининг салкам ярмидан кўпи кейинги машинасини сотиб олишда ўзи аввал фойдаланган маркани яна танламоқда. АҚШ автомобиль бозори бўйича ўртача садоқат даражаси 52 фоизни ташкил этган.
Рейтингда Tesla 64 фоизлик кўрсаткич билан биринчи ўринни эгаллади. Бу иккинчи йирик оммавий кўрсаткичлардан бири бўлган Toyota натижасидан 4 фоиз пунктга ва АҚШ автомобил бозори бўйича ўртача даражадан 12 фоиз пунктга юқори.
2003 йилда ташкил этилган Tesla 2020 йилда илк бор тўлиқ йил якунлари бўйича фойда билан ишлаган. Кейинги даврда компания кўп вақт давомида бозор капитализацияси бўйича дунёдаги энг қиммат автомобил ишлаб чиқарувчилардан бири бўлиб келди.
2025 йилда Tesla АҚШ бозорида қарийб 600 мингта электромобил сотган.
Tesla мижозларининг юқори садоқати компаниянинг АҚШ электромобиллар бозоридаги кучли позицияси билан ҳам уйғунлашади. Бренд автомобиллари мамлакатда сотилаётган электромобилларнинг қарийб ярмини ташкил этади.
Бироқ компаниянинг глобал натижалари бир хил эмас. 2025 йилда Teslaʼнинг жаҳон бўйича сотувлари аввалги йилга нисбатан 9 фоизга камайган. Бунга рақобатнинг кучайиши ва компания бош директори Илон Маск фаолиятига нисбатан турлича муносабат ҳам таъсир қилгани қайд этилган.
Teslaʼдан кейин мижозлар садоқати бўйича Ferrari жойлашди. Италиянинг люкс автомобиллар ишлаб чиқарувчиси 61 фоизлик натижа билан иккинчи ўринни эгаллаган.
Ferrari яқинда ўзининг электр модели билан ҳам чиқди. Шунга қарамай, бренднинг асосий устунликларидан бири унинг ўзига хос имижи ва харидорлари орасида шаклланган юқори садоқат даражаси бўлиб қолмоқда.
Кейинги уч ўринни Япония автомобил брендлари эгаллаган. Toyotaʼда мижозлар садоқати 60 фоиз, Subaruʼда 59 фоиз, Hondaʼда эса 58 фоизни ташкил этган.
