АҚШ президенти Доналд Трамп Халқаро футбол федерацияси (ФИФА) бирор сабабга кўра ташкилот раҳбари Жанни Инфантинони алмаштириш ҳақида ўйласа, “даҳшатли хатога йўл қўйишини” маълум қилди. Бу ҳақда у Truth Social ижтимоий тармоғида ёзиб қолдирди.
Трампнинг фикрича, ФИФА раҳбари тарихда “энг муваффақиятли жаҳон чемпионатини” ўтказди ва агар у лавозимидан кетса, жаҳон чемпионатлари ҳеч қачон бунчалик даромадли бўлмайди.
Июль ойи охирида Инфантинонинг жаҳон чемпионатидаги улушларни хусусий инвесторларга сотишга қарор қилгани маълум бўлди. Ҳуқуқларнинг тахминан 20 фоизини Доналд Трампнинг куёви Жаред Кушнернинг укаси Жошуа Кушнер бошчилигидаги хусусий инвесторлар гуруҳи олиши кутилганди.
Бу ғоя дунё миллий футбол федерацияларининг кескин танқидига сабаб бўлди. Улар агар улушни сотиш тўғрисида қарор қабул қилинса, жаҳон чемпионатларини бойкот этиш билан таҳдид қилди. Шундан сўнг ФИФА жаҳон чемпионатидаги улушларни хусусий инвесторларга сотиш режаларидан воз кечганини эълон қилди, Инфантинонинг ўзи эса узр сўради.
