Ички ишлар вазири, генерал-лейтенант Азиз Тошпўлатов раҳбарлигида вазирликнинг 2026 йил иккинчи чорагидаги фаолияти якунларига бағишланган Ҳайъат йиғилиши ўтказилди.
Йиғилишда жорий йилнинг биринчи ярмида республикадаги криминоген вазият, оғир ва ўта оғир жиноятлар, жамоат хавфсизлигини таъминлаш, кибержиноятчиликка қарши курашиш ҳамда хизмат интизоми билан боғлиқ масалалар муҳокама қилинди.
Ҳисобот натижаларига кўра, ўтган олти ой давомида ҳудудлардаги криминоген вазиятни барқарорлаштиришда жиддий камчиликларга йўл қўйган 6 нафар шаҳар ва туман ички ишлар органлари бошлиқлари, уларнинг жамоат хавфсизлигини таъминлаш йўналиши бўйича 2 нафар ўринбосари ҳамда вилоят ички ишлар бошқармаларининг 2 нафар масъул раҳбарини лавозимидан озод этиш бўйича Ҳайъат қарори қабул қилинди.
Бундан ташқари, 7 нафар раҳбарга қаттиқ интизомий жазо қўллаш, яна 3 нафар раҳбарнинг лавозимида қолиш ёки қолмаслик масаласини кўриб чиқиш белгиланди.
Йиғилишда келтирилган маълумотларга кўра, 2026 йилнинг дастлабки олти ойида 5 778 та маҳаллада, яъни маҳаллаларнинг 64 фоизида жиноят содир этилишига йўл қўйилмаган. Шу билан бирга, 476 та маҳалланинг ҳануз “қизил” тоифада қолаётгани танқид қилинди.
Ҳисобот даврида қидирувда бўлган 5 010 нафар шахс қўлга олинган, бедарак йўқолган 2 616 нафар шахс аниқланган. Жиноятларни аниқлаш кўрсаткичи 31,4 фоизга яхшиланиб, фуқароларга етказилган 1 трлн 365 млрд сўмлик моддий зарар қоплаб берилган.
Кибержиноятчиликка қарши курашиш йўналишида эса олти ойда 9 282 та кибержиноят фош этилган, 4 011 та жиноят ташаббус асосида аниқланган. 13 мингдан ортиқ фуқарога етказилган 120 млрд 496 млн сўмдан зиёд зарар қайтарилган.
Марказий банк билан ҳамкорликда йўлга қўйилган махсус тизим орқали 29 трлн сўмнинг ноқонуний равишда четга чиқиб кетишининг олди олинган, жиноятларга алоқадор 18 838 та банк картаси блокланган.
Шу билан бирга, рейтинг натижаларига кўра жиноятларнинг олдини олиш ва уларни ташаббус асосида аниқлаш бўйича энг яхши натижа кўрсатган ҳудудий ички ишлар органлари раҳбарларини рағбатлантириш таклиф қилинди. Вилоятлар орасида Тошкент вилояти биринчи, Самарқанд вилояти иккинчи, Фарғона вилояти эса учинчи ўринни эгаллади.
Ҳайъат йиғилиши якунида жамоат хавфсизлигини таъминлаш, жиноятчиликка қарши курашиш ва хизмат интизомини мустаҳкамлаш бўйича белгиланган вазифалар ижроси устидан қатъий назорат ўрнатилиши қайд этилди.
