Хитой билан алоқадор ҳакерлар бир нечта сунъий интеллект (СИ) агенти ёрдамида Тайван ҳукумат сайтларига киберҳужум уюштирди. Бу ҳақда Financial Times нашри киберхавфсизлик билан шуғулланувчи Исроилнинг Dream компанияси маълумотларига таяниб ёзмоқда.
Ҳужумни биринчи бўлиб аниқлаган тадқиқотчиларнинг журналистларга айтишича, тажовузкорлар очиқ кодли саккизтагача сунъий интеллект агентидан фойдаланган. Улар бузиб кириш учун восита яратган мувофиқлаштирилган кибержамоа сифатида ҳаракат қилган.
Июль ойи бошида СИ агентлари заифликларни қидириш мақсадида 21 та ҳукумат тизимининг харитасини тузган. Улар ушбу тизимлар фойдаланувчиларининг камида 85 та аккаунтини бузиб кириб, ходимларга оид 2,5 мингдан ортиқ ёзувни ўғирлаган. Шундан сўнг ҳужумни Тайван ядро хавфсизлиги агентлиги ва камида еттита энергетика компаниясига ҳам ёйган.
Dream компанияси Осиё-Тинч океани минтақасидаги давлатлардан бирига бузғунчилик ҳақида хабар берганини, бироқ айнан қайси давлат эканига аниқлик киритмаганини маълум қилди. FT манбалари ҳужум айнан Тайванга қаратилганини тасдиқламоқда. Ҳакерларнинг Хитой билан алоқадорлигини ҳужумга оид ички ёзишмаларда соддалаштирилган хитой тилидан фойдаланилгани кўрсатиб турибди.
Хитой ҳукумати вакиллари газетанинг изоҳ бериш ҳақидаги сўровини жавобсиз қолдирди. Тайван Рақамли технологиялар вазирлиги эса маълумотлар махфийлигини сабаб қилиб, ушбу бузғунчилик юзасидан изоҳ беришдан бош тортди.
