Миллий статистика қўмитаси маълумотларига кўра, 2026 йилнинг январ–июн ойларида Ўзбекистонга хориждан жами 37 874 дона электромобил импорт қилинган.
Олиб келинган электромобилларнинг умумий қиймати 447,7 миллион АҚШ долларини ташкил этган.
Қайд этилишича, бу ўтган йилнинг мос даврига нисбатан 23,5 мингтага кўп. Натижада электромобиллар импорти бир йил ичида 2,6 баробарга ошган.
Электромобилларнинг мутлақ катта қисми Хитойдан олиб келинган. Олти ойда ушбу давлатдан Ўзбекистонга 37 560 та электромобил етказиб берилган.
Шунингдек, Ҳонгконгдан 141 та, Кореядан 80 та, Германиядан 42 та ва АҚШдан 21 та электромобил импорт қилинган. Бошқа давлатлар ҳиссасига эса 30 та электромобил тўғри келган.
Шу тариқа, 2026 йилнинг биринчи ярмида Ўзбекистон электромобил бозорида импорт ҳажмининг сезиларли ўсиши кузатилган.
