Қонунчиликка киритилган қўшимчалар билан лицензия ёки рухсат этиш хусусиятига эга ҳужжатни «Бизнесга лицензиясиз кириш» махсус режими доирасида олиш тартиби белгиланди.
Унга кўра, талабгор махсус электрон тизим ёки Ягона интерактив давлат хизматлари портали орқали ваколатли органни бепул хабардор қилган ҳолда, тегишли фаолиятни лицензия ёки рухсат этиш хусусиятига эга ҳужжатсиз бошлаши мумкин.
Махсус режимнинг амал қилиш муддати 3 ой этиб белгиланган. Ушбу даврда талабгор муайян фаолиятни лицензиясиз ёки рухсат берувчи ҳужжатсиз амалга оширгани учун жавобгарликка тортилмайди.
Бироқ тадбиркор 3 ой давомида ўз фаолиятини лицензия ёки рухсат бериш талаблари ва шартларига мувофиқлаштириши лозим.
Шу муддат ичида у белгиланган тартибда тегишли лицензия ёки рухсат этиш хусусиятига эга ҳужжатни олиши ёхуд мазкур фаолиятни тугатиши керак бўлади.
Қонун билан архив ҳужжатларини сақлаш муддатларига ҳам аниқлик киритилди. Хусусан, махфий ҳужжатларни 30 йил давомида сақлаш белгиланди.
Шунингдек, 2019 йил 1 январгача иш юритуви якунланган шахсий таркиб бўйича ҳужжатлар идоравий архивларда 75 йил, 2019 йил 1 январдан бошлаб шакллантирилган бундай ҳужжатлар эса 50 йил давомида сақланади.
