Полша расмийлари Россия махсус хизматлари топшириғи билан Украина ва АҚШ фуқаролигига эга шахсга суиқасд тайёрлаганликда гумон қилинаётган Россия фуқароси ушланганини маълум қилди.
Rzeczpospolita нашрининг ёзишича, бу ҳақда 13 август куни Полша бош вазири Доналд Туск хабар берган. Унинг аниқлик киритишича, гумонланувчи 7 август куни қўлга олинган.
Тускнинг сўзларига кўра, Владимир Путин режими учун «ноқулай бўлган» шахсни ўлдириш режаси «сўнгги лаҳзада» барбод қилинган.
RMF FM радиостанцияси норасмий манбаларга таяниб хабар беришича, суиқасд нишони Украинага маҳсулот етказиб берувчи қурол-яроғ саноати пудратчиси бўлган. Ҳужумни тайёрлашда гумон қилинаётган шахс 29 ёшли, Донбассда туғилган Россия фуқароси экани айтилмоқда.
Қотиллик Варшавада амалга оширилиши режалаштирилган. Полша махсус хизматлари координатори Томаш Семонякнинг маълум қилишича, гумонланувчини қўлга олиш операцияси АҚШ томони билан ҳамкорликда ўтказилган.
Доналд Туск буни Россиядан бўлган шахс НАТОга аъзо давлат ҳудудида АҚШ фуқаросига суиқасд режалаштиришда гумон қилинган илк ҳолат сифатида баҳолади.
Полша бош вазири Россия ҳукумати ўзи учун «ноқулай» деб ҳисоблаган шахсларни йўқ қилишга уриниши мумкинлигини инобатга олиш зарурлигини таъкидлаб, Варшава бундай таҳдидларга қарши фаол чоралар кўришини билдирди.
Полшада россиялик рассомнинг ўлдирилиши
Бу воқеадан аввал, 15 июн куни Полшанинг Беларус билан чегараси яқинидаги Бяла-Подляска шаҳрида россиялик рассом-акционист Семён Скрепецкий отиб ўлдирилган эди. Унинг ҳақиқий исми Роберт Кузовков бўлган.
The Insider маълумотига кўра, рассом ўлдирилишидан тахминан бир соат аввал унга «рус патриотлари» таҳдид қилаётгани ҳақида хабар берган.
Ушбу иш доирасида дастлаб уч киши қўлга олинган. ОАВ хабарларига кўра, уларнинг камида икки нафари Беларус фуқароси бўлган. Кейинчалик тергов уларнинг жиноятга алоқадорлигини тасдиқламагач, сўроқдан сўнг қўйиб юборилган.
18 июн куни Доналд Туск Скрепецкийнинг ўлдирилишига алоқадорликда гумон қилинган яна бир шахс ушланганини маълум қилган. Унинг ёнидан Гуржистон паспорти топилгани айтилган.
Скрепецкий 2021 йилда Россиядан Полшага кўчиб ўтган. У Россия ҳукуматига қарши қаратилган карикатуралари ва сиёсий акциялари билан танилган эди.
