Сицилияда Этна вулқони уйғонди – суратлар

Сицилиянинг шарқий соҳилида бир ҳафтадан буён Европадаги энг йирик вулқон – Этна вулқони отилиши кузатилмоқда. Катаниядаги Миллий геофизика ва вулқоншунослик институти обсерваторияси директори Салво Гамбинонинг сўзларига кўра, бундай узоқ давом этган отилиш 1970-йиллар охиридан бери кузатилмаган. У сўнгги ўн йилликларда бир неча бор лава оқимлари кузатилгани, аммо одатда бундай ҳолатлар бир неча соатда тўхтаганини қайд этган. Вулқон кули Катания аэропорти фаолиятига жиддий таъсир кўрсатган ва сўнгги ҳафта давомида – сайёҳлик мавсуми авжида мингдан ортиқ рейс бекор қилинган. Айрим йўловчилар бир неча кундан буён терминалларда тунашга мажбур бўлмоқда. Гамбинонинг сўзларига кўра, вулқон отилиши қанча давом этишини олдиндан айтиб бўлмайди – у «эртага, бир неча кундан кейин, бир ҳафта ёки бир ойдан кейин» тўхташи мумкин.