Ўзбекистон президенти тадбиркорлар билан мулоқотда экспортни ошириш ва миллий брендларни ташқи бозорларга олиб чиқиш бўйича қатор янгиликларни эълон қилди.
Ўрганишларга кўра, экспортчиларнинг 40 фоизи хорижлик мижоз топишга, 36 фоизи стандарт ва сертификация талабларига мослашишга қийналмоқда. 37 фоизида қулай молиявий инструментлар, 33 фоизида бозор, маркетинг ва бренд бўйича кўникмалар етишмайди.
Валюта бўйича талаблар
Экспортда муддати ўтган қарздорлик муаммоси бўйича енгилликлар берилади. Йил якунигача қарзни қоплаш учун банк ҳисобрақамига валюта қўйилса, у экспорт тушуми сифатида қабул қилинади.
Товар учун тўлов келмаган бўлса ҳам экспортга чеклов бекор қилинади, инвойсда 50 фоиз олдиндан тушум талаби олиб ташланади.
Савдо уйлари ва дистрибюторлар орқали экспортда валюта тушумини таъминлаш муддати 180 кундан 365 кунга узайтирилади.
“Экспорт навигатор”
Давлат раҳбарига кўра, ташқи бозорга чиқишнинг барча босқичларида комплекс хизмат кўрсатадиган “экспорт навигатор” тизими йўлга қўйилади. Хорижда талаб юқори бўлган 100 та маҳсулотнинг рўйхати шакллантирилади.
Ҳар бир маҳсулот бўйича ташқи бозордаги рақобатчилар, тариф тизими ва логистика ечимлари ишлаб чиқилади. 2 мингта корхонанинг ишлаб чиқариш жараёни ташқи бозор ва харидор сегментига мослаштирилади.
Тадбиркорларга хорижий брендмейкер жалб қилиш харажатининг ярми – 500 минг долларгача қоплаб берилади. Миллий брендни ташқи бозорда тарғиб қилиш ва халқаро талабларга мослаштириш учун 50 минг долларгача субсидия ажратилади.
Маркетплейсларда омборга жойлаштириш ва сотиш харажатининг ярми, халқаро тендерлар учун консалтинг харажатининг 80 фоизи компенсация қилинади. Экспортчиларни қўллаб-қувватлашнинг ягона тизимига камида 1 миллиард доллар йўналтирилади.
“Бугун дунёда бозор учун кураш кун сайин кучайиб боряпти. Бундай вазиятда хорижга чиққан тадбиркор ҳеч қачон ўзини ёлғиз ҳис қилмаслиги керак”, – деди президент.
“Экспорт элчилари”
Элчиларга қаерда янги имконият ва бозор бўлса, тадбиркорларни биринчи бўлиб “қўлидан ушлаб” олиб бориш вазифаси қўйилди.
Экспортнинг 60 фоизи тўғри келаётган 20 та давлат ва истиқболи юқори яна 5 та давлатда “экспорт элчилари” фаолияти йўлга қўйилади. Уларни ўша бозорга энг кўп экспорт қилаётган тадбиркорларнинг ўзи сайлайди.
“Экспорт элчилари” савдо тармоқлари, сертификат ва маркетинг масалаларида бошқа тадбиркорларга кўмаклашади. Уларнинг бориш-келиш ва яшаш харажатлари қоплаб берилади.
