Сиёсатчи бу ҳақда Оқ уй олдида журналистларга айтиб ўтди.
«Ҳа, мен шундай қиламан», — деди Трамп.
«Ким Чен Ин билан муносабатларимиз яхши. Унда жуда қудратли 57 та ядро қуроли бор. Бунга йўл қўймаслик керак эди, аммо бу қуроллар унда бор. Мен уни жуда яхши биламан. Бизда ақлли президент бор экан, унинг ишлари яхши бўлади. Агар аҳмоқ президент бўлса, унинг ишлари яхши бўлмайди», деб қўшимча қилди АҚШ президенти.
The Wall Street Journal нашрининг ёзишича, Трамп Пхенян ядровий дастури бўйича музокараларни қайта тиклаш учун шу йил кузда учрашмоқчи.
Трамп ва Ким Чен Ин Америка етакчисининг биринчи президентлик даврида уч марта — 2018 йилда бир марта ва 2019 йилда икки марта учрашган. Томонлар КХДР ядровий инфратузилмасини йўқ қилиш шартлари бўйича келиша олмагач, денуклеаризация бўйича музокаралар келишувсиз якунланган эди.
Шу ҳафта бошида Трамп Шимолий Корея етакчиси мулоқот таклифига жавоб берганини айтиб, «Ким Чен Ин менга доим катта ҳурмат билан муносабатда бўлган», деб қўшимча қилди.
