Япония нашрлари ёзишича, бу ҳолат 20 август куни рўй берган. Ота 7 ва 12 ёшлардаги ўғиллари билан анъанавий маршрут бўйича Фудзияма чўққисини (баландлиги – 3776 метр) забт этиш учун йўлга чиққан.
Маршрут бошида кичик ўғил чарчаганини айтган. Каттаси эса анча олдинга чиқиб кетганди, натижада ота кичик ўғлини йўл четидаги ўриндиққа ўтирғизиб, унга ичимлик ва егулик берган ҳамда шу жойда кутиб туришни тайинлаган, ўзи эса юқорига юришда давом этган.
«Фудзиномия» маршрутидаги олтинчи станция ишчилари 2 километрдан ортиқ баландликда болани учратиб қолишган. У туман ичида ва ёмғир остида ўтирганди.
Ишчилар полицияни чақиришган ва еттинчи ва саккизинчи станциялар оралиғида отани ҳам топишган – бу у болани қолдирган жойдан пиёда юрганда тахминан уч соатлик масофа эди.
Полициячилар отага зудлик билан қайтишни буюришган ва ўғлини ёлғиз қолдиргани учун унга қатъий огоҳлантириш берилган. Натижада бола саккиз соат давомида бир жойда қолиб кетган.
«Тоққа кўтарилишдан воз кечишга тўғри келса ҳам, болани қолдириб кетмаслик керак эди», – дея полициячилардан бирининг сўзларини келтиради Japan Today нашри.
Ота хатога йўл қўйганига иқрор бўлиб, полициядан узр сўраган.
Ота ўғиллари билан ҳаракатланган «Фудзиномия» маршрути жамоат транспортида етиб бориш мумкин бўлган бешинчи станциядан бошланади.
Шу станциядан чўққига чиқишгача беш соат вақт кетади, ортга тушишга яна уч соатга яқин вақт талаб этилади.
Сўнгги вақтларда Фудзиямада бир неча кўнгилсиз ҳодисалар рўй берган.
Июл ойида унинг ёнбағирларидан йиқилиб, сони ва белини жароҳатлаган 99 ёшли аёлни эвакуация қилишга тўғри келган, ўтган йили эса у ерга мавсумий чеклов амал қилаётган даврда чиққан 27 ёшли талабани икки марта қутқаришга тўғри келган. Иккинчи мартасида у йўқолган мобил телефонини қидириш учун қайта чиқиб кетганди.
Токиодан жануби-ғарбдаги Фудзияма тоғи Япониянинг учта муқаддас тоғларидан бири ҳисобланади ва кўплаб анъанавий япон расмларида тасвирланган.
2013 йил ушбу тоғ ЮНЕСКОнинг Жаҳон мероси рўйхатига киритилган.
Ҳар йили Фудзияма чўққисига 200 мингга яқин одам чиқади, мавсумий чекловлардан ташқари, баъзи йўналишларда чўққини забт этиш учун кунлик чекловлар ҳам амал қилади.
