АҚШ Марказий разведка бошқармаси (МРБ) директори Жон Рэтклифф Москвага эълон қилинмаган ташриф билан борди. У Ригадан АҚШ Ҳарбий-ҳаво кучларига қарашли Boeing C-17 ҳарбий-транспорт самолётида учди ва 25 август куни эрталаб «Внуково» аэропортига қўнди. Тахминан соат 19:00 да Рэтклиффни олиб келган Америка самолёти Москвадан ортга учиб кетгани маълум бўлди.
Бу МРБ раҳбарининг 2021 йилдан бери Москвага илк ташрифидир. Ўшанда Россия қўшинларининг Украина чегаралари яқинига тўпланиши фонида идоранинг аввалги раҳбари Уилям Бёрнс Москвага борган эди. Рэтклиффнинг бу сафарги ташрифи – АҚШ маъмурияти вакилининг Россияга 2026 йил январидан буён амалга оширган биринчи ташрифидир.
Рэтклифф ташрифининг мақсадлари номаълум. МРБ раҳбарининг сафари ҳақида расман хабар берилмади. Кремль эса «Внуково»даги Америка самолёти ҳақида гўёки ҳеч нарса билмаслигини ва бу ҳафта Америка маъмурияти вакиллари билан учрашувлар режалаштирилмаганини маълум қилди. Кремль мухбири Александр Юнашевнинг сўзларига кўра, Рэтклиффнинг ташрифи туфайли Владимир Путин ўз иш жадвалини ўзгартириб, 25 августга режалаштирилган йирик тадбирни бекор қилган. Axios’нинг таъкидлашича, Рэтклифф музокаралар учун борган. Ким билан ва нима ҳақида экани номаълум.
Версиялардан бирига кўра, унинг ташрифи Россияда судланган америкалик Чарлз Зиммерманнинг озод этилиши билан боғлиқ бўлиши мумкин. Бу ҳақда Ксения Собчак ўз Телеграм-каналида ахборот манбасини кўрсатмаган ҳолда ёзган. Агар шундай бўлса, Зиммерман бир ой ичида Россия ҳукумати томонидан авф этилиб, ватанига қайтарилган иккинчи АҚШ фуқароси бўлади. Биринчиси Роберт Гилман эди. Унинг маҳбуслар алмашинувисиз қайтарилиши Москва ва Киев ўртасида Америка томони иштирокидаги тинчлик музокараларининг янги босқичига эҳтимолий тайёргарлик сифатида кўрилганди.
Бошқа бир версияга кўра, Рэтклифф Москвада қандайдир «муҳим операция»ни муҳокама қилган. Бу ҳақда Украина президенти девони раҳбари Кирилл Будановга яқин бўлган Ukraine Context Телеграм-канали хабар тарқатди. Канал муаллифлари гап «бир мунча вақт махфийлик режимида тайёрланган» ва «натижалари кейинги жараёнлар учун жиддий аҳамият касб этиши мумкин» бўлган операция ҳақида кетаётганини даъво қилмоқда.
Учинчи версия – Рэтклифф Путинга “огоҳлантириш” етказиш учун борган. Бундай версияни The Wall Street Journal илгари сурди. Газетанинг маълумотларига кўра, АҚШ разведкаси Россия Украина билан урушни давом эттириш учун сафарбарликка тайёргарлик кўра бошлагани ва альянсга аъзо мамлакатларга қарши провокация уюштириб, «НАТО қатъиятини синаб кўришни» режалаштираётгани мумкинлиги ҳақида маълумот тўплаган. Нашр, шунингдек, ташриф АҚШ ва Эрон ўртасидаги уруш билан боғлиқ бўлиши мумкинлигини ҳам тахмин қилмоқда. Россия Теҳроннинг иттифоқчисидир. Бир кун аввал Вашингтон душманига қарши янги иқтисодий босим кампаниясини эълон қилган эди.
