Россия Украина чегаралари яқинида реактив дронларни учиришга мўлжалланган янги йирик база қурилишини атиги олти ҳафта ичида деярли якунлади, деб ёзди сунъий йўлдош тасвирларини ўрганган Reuters агентлиги.
База Ростов вилоятида қурилмоқда. Агентликнинг таъкидлашича, 31 август куни унинг ўрнида бўш дала бўлган, ҳозир эса у ерда майдони 126 та футбол майдонига тенг улкан мажмуа қад ростлаган.
DroneSec хусусий разведка компанияси асосчиси Майк Монник фикрича, суратлардан кўриниб турибдики, база энг янги «Герань-4» ва «Герань-5» реактив дронларини учиришга мўлжалланган. Мажмуанинг ғарбий қисмида саккизта учириш қурилмаси жойлашган.
Экспертнинг баҳолашича, база кунига 100 га яқин реактив дронни учириш имкониятини бера олади. У «саноқли ҳафталар ичида» тўлиқ фойдаланишга топширилиши мумкин.
Россия сўнгги бир неча ой ичида Украинага зарба бериш учун реактив дронлардан фаол фойдаланишни бошлади. Уларнинг оддий дронлардан фарқи — парвоз масофаси ва тезлигининг сезиларли даражада ошганидир. Уларни уриб тушириш оддий дронларга қараганда қийинроқ.
