Россия мамлакат энергетика тизимини ишдан чиқариш ва, хусусан, Киев, Харьков ҳамда Одессани электр энергияси, иситиш ва сувсиз қолдириш орқали Украинани келгуси қишда таслим бўлишга мажбурлашни кўзламоқда. Бу ҳақда The New York Times ёзди. Нашр журналистлари Украина томонидан қўлга киритилган ва сентябрь ойида европалик иттифоқчиларга кўрсатилган Россия ҳукумати режаси билан танишиб чиқди.
Режага кўра, Украинанинг учта энг йирик шаҳрини сув, электр энергияси ва иситиш тизимидан маҳрум қилиш учун Россияга 70 га яқин баллистик ракета, 720 та узоқ масофага учувчи дрон ва 150 та бошқариладиган авиабомба керак бўлади. Россия ҳарбий стратегларининг фикрича, ана шундай жадалликдаги бир ойлик зарбалар оқибатида Украинанинг энергетика тизими вайрон бўлади.
Газетанинг таъкидлашича, урушнинг бешинчи йилига келиб, Украина электр станциялари аввалги ҳужумлар туфайли тўлиқ қувват билан ишлаш қобилиятини йўқотган — ва ҳар бир янги зарба уларни тезда ишдан чиқаради. Хусусан, уруш бошланишидан олдин Киевни таъминлайдиган учта ИЭМ умумий қуввати тахминан 1,3 гигаваттни ташкил этган бўлса, ҳозир бу кўрсаткич қарийб 500 мегаваттгача қисқарган.
Нашрнинг ёзишича, агар Россиянинг режаси иш берса, Киев, Харьков ва Одесса энергия қувватларининг 90 фоизини йўқотиши, иссиқлик таъминоти 90 фоизга қисқариши билан тўқнаш келиши ва бунинг оқибатида сув таъминоти ҳамда канализация тизимлари фаолиятида узилишлар юзага келиши мумкин.
Россиянинг бу режа амалга ошишига бўлган ишончи кўп жиҳатдан Украинада ҳаво ҳужумидан мудофаа воситалари, биринчи навбатда, Patriot тизимлари учун ракеталар етишмаслиги билан изоҳланади. Уларсиз Украина Қуролли кучлари баллистик ракеталардан ҳимояланишга деярли қодир эмас.
Таҳлилчилар ҳозир Москва учун ҳаво кампаниясида муваффақиятга эришиш эҳтимоли урушнинг бошқа ҳар қандай давридагига қараганда ҳақиқатан ҳам юқорироқ эканини таъкидламоқда. Украинанинг ракетага қарши мудофаа тизими Америка ёрдамининг қисқариши туфайли «ҳолдан тойган», Россиянинг ракета ва дронлар арсенали янада кучли ва самаралироқ бўлган, Украинанинг энергетика инфратузилмаси эса йиллар давомида берилган зарбаларнинг тўпланиб қолган таъсири оқибатида ҳозир анча заифлашган.
Шу сабабли, Киев мунтазам равишда таклиф қилаётган энергетика сулҳига Москванинг қандайдир шаклда рози бўлиш эҳтимоли жуда паст. «Уларда украиналикларга босим ўтказиш учун қолган ягона ричаг — бу ҳаво зарбаларидир. Уларда бошқа ҳеч нарса йўқ», — деди Rasmussen Global консалтинг компанияси директори Гарри Неделку The New York Times нашрига.
