Суми вилоятида Ромни ҳудудий жамоаси ҳужумга учраган. Вилоят ҳарбий маъмурияти раҳбари Олег Григоровнинг маълум қилишича, турар жой биносига зарба берилиши оқибатида 66 ёшли аёл ҳалок бўлган.
Дастлабки маълумотларга кўра, ҳудудга тўққизта учувчисиз учиш аппарати билан ҳужум қилинган. Уларнинг бир қисми уриб туширилган, бироқ фуқаролик инфратузилмаси объектларига зарбалар қайд этилган. Ҳужумдан кейин тўрт киши тиббий ёрдам сўраб мурожаат қилган.
Запорижжяда ҳам ҳужум оқибатида жабрланганлар бор. Вилоят ҳарбий маъмурияти раҳбари Иван Федоровнинг билдиришича, икки нафар эркак ва бир нафар аёл жароҳатланган.
Зарба натижасида автомобил ва бир нечта бино шикастланган, шунингдек, ёнғин келиб чиққан.
Кривий Рихда эса ракета зарбаси натижасида саноат корхонасига зарар етган. Шаҳар мэри Александр Вилкулнинг маълум қилишича, икки киши жароҳатланган, уларнинг аҳволи оғир эмас.
Тун давомида Украина пойтахти Киев ҳам ҳужумга учраган. Киев шаҳар ҳарбий маъмурияти маълумотларига кўра, ҳаво ҳужуми оқибатидаги парчалар икки жойга — Подолский туманидаги турар жой биноси ҳовлисига ва Шевченко туманидаги таълим муассасаси ҳудудига тушган.
Бундан аввал Киевда баллистик ракета ва дронлар хавфи сабаб ҳаво тревогаси эълон қилинган эди.
Харкивда эса дрон турар жой биносининг тўртинчи қаватидаги балконга келиб урилган. Харкив вилояти ҳарбий маъмурияти раҳбари Олег Синегубовнинг маълум қилишича, ҳодиса оқибатида 30 ёшли эркакда кучли стресс реакцияси кузатилган.
Полтава вилояти ҳарбий маъмурияти раҳбари Виталий Дякивнич ҳам ҳудудга ҳужум қилинганини маълум қилган. Бироқ у зарбаларнинг хусусияти ва уларнинг оқибатлари ҳақида қўшимча маълумот келтирмаган.
Маҳаллий ҳокимиятлар ҳужумлар оқибатларини аниқлаш ва зарар кўрган объектларда тегишли хизматлар ишини давом эттираётганини билдирган.
