Ўзбекистон Мудофаа вазирлиги номини тилга олмаган ҳолда «ҳаво сарҳадларимизни қўриқлаётган замонавий қирувчи самолётлар»ни намойиш қилди.
Ушбу самолётлар Хитойда ишлаб чиқарилган J-10 қирувчи самолётининг экспорт версияси - J-10CE ҳисобланади.
Вазирлик ҳозирча уларнинг сони, техник хусусиятлари ва нархи борасида маълумотлар бермади.
Kun.uz июль ойининг охирида хитойлик ҳарбий кузатувчилар ва очиқ манбалар таҳлилчиларига таяниб, Ўзбекистон Ҳарбий-ҳаво кучлари сафига яна тўртта J-10CE қирувчи самолёти қўшилгани ҳақида ёзганди. Ўшанда расмий Тошкент ҳам, Пекин ҳам бу маълумотларни тасдиқламаган ва рад ҳам қилмаганди.
Марказий Осиё осмонида ҳарбий мувозанатнинг ўзгариши олиб келиши кутилаётган ушбу хабар бунга қадар ҳам минтақада кенг муҳокамаларга сабаб бўлганди.
J-10CE қандай самолёт?
Таҳлилчиларга кўра, техник жиҳатдан бу қирувчи самолёт Ўзбекистон армиясини сифат жиҳатидан янги босқичга олиб чиқади. Бир ўринли Chengdu J-10CE – 4,5 авлод қирувчи самолёти бўлиб, 2 Max – 2300 км/соат тезликка чиқа олади. У фаол фазали антеннага эга радар (AESA) билан жиҳозланган бўлиб, бир вақтнинг ўзида бир нечта нишонни кузатиш ва уларга зарба бериш имконини беради. Ўзбекистон ҳарбий ҳаво кучларида фойдаланаётган, советлардан қолган МиГ-29 ва Су-27 самолётларидаги эски радарлар бунга қодир эмас.
Хитой қирувчисининг асосий қуроли — PL-15E ракетаси 100 километрдан ортиқ масофада нишонларга мўлжалга олади. Қирувчида 11 та осма нуқта (hardpoints) — қурол ва ускуналар илинадиган тугунлар бор. Уларга ҳаво-ҳаво, ҳаво-ер ва ҳаво-кема типидаги қуролларни илиш мумкин. Бу эса самолётга турли нишонларига зарба беришда универсаллик беради.
