Олий Мажлис Сенатида Сингапур Республикасининг катта вазири Ли Сян Лун иштирокида тадбир бўлиб ўтди.
Унда Ўзбекистон ва Сингапур ўртасидаги муносабатларнинг бугунги ҳолати, парламентлараро ҳамкорликни ривожлантириш, шунингдек, давлат бошқаруви, таълим ва инсон капитали соҳаларида тажриба алмашиш масалалари муҳокама қилинди.
Тадбирни очиб берган Сенат раиси Сингапурнинг қисқа тарихий даврда юқори тараққиёт даражасига эришишида узоқ муддатли стратегик ислоҳотлар, қонун устуворлиги, самарали давлат бошқаруви ва инсон капиталига устувор эътибор муҳим ўрин тутганини таъкидлади.
Қайд этилишича, Ўзбекистон ва Сингапур ўртасида дипломатик муносабатлар ўрнатилганига қарийб 30 йил бўлди. Сўнгги йилларда икки давлат раҳбарлари ўртасидаги мунтазам мулоқотлар ўзаро алоқаларни янги босқичга олиб чиқди. Парламент делегацияларининг ташрифлари, қўмиталар ва парламентлараро ҳамкорлик гуруҳлари ўртасидаги алоқалар ҳам изчил ривожланмоқда.
Шундан сўнг Ли Сян Лун нутқ сўзлаб, замонавий дунёда кечаётган жараёнлар, Осиё минтақасидаги тараққиёт тенденциялари ва глобал таҳдидларга тўхталди. У бундай таҳдидларга биргаликда жавоб қайтариш муҳимлигини қайд этди.
Сингапур катта вазири Ўзбекистон ва Сингапур ўртасидаги ҳамкорликнинг бугунги ҳолати ва истиқболларига ҳам эътибор қаратиб, давлат бошқаруви, таълим, инсон капитали, инновациялар ва иқтисодий тараққиёт соҳаларида тажриба алмашиш муҳимлигини таъкидлади.
Учрашувда қонун ижодкорлиги бўйича тажриба алмашиш, парламент фаолиятини рақамлаштириш, давлат сиёсати, таълим ва ёшлар сиёсати, шунингдек, замонавий кадрлар тайёрлаш йўналишларида ҳамкорликни кенгайтириш масалалари муҳокама қилинди.
Маълум қилинишича, Олий Мажлисда Сингапур парламенти билан ҳамкорлик бўйича гуруҳнинг янгиланган таркиби тасдиқланган. Гуруҳнинг навбатдаги йиғилишида Ли Сян Лун нутқида илгари сурилган таклифларни муҳокама қилиш режалаштирилган.
