30 август куни Жиззах вилояти Зафаробод туман ҳокими Ғайратжон Эшпўлатов ўзига бириктирилган KIA Seltos русумли хизмат автомобилида йўл-транспорт ҳодисасига учрагани айтилмоқда. Kun.uz'нинг бир-биридан мустақил икки манбаси автомобил катта юк машинасининг орқа томонига урилгани, рулда ҳокимнинг мактабда ўқийдиган ўғли бўлганини маълум қилди.
Манбага кўра, тан жароҳатлари олган ота-бола дастлаб Зафаробод туман тиббиёт бирлашмасига олиб борилган. Аммо уларнинг аҳволи оғир бўлгани боис тез ёрдам машинасида Республика шошилинч ёрдам илмий марказининг Жиззах шаҳридаги филиалига олиб кетилган.
Маълумот учун, Ғайратжон Эшпўлатов 2024 йил 5 мартидан бери Зафаробод тумани ҳокими лавозимини эгаллаб келмоқда. У бунга қадар Пахтакор тумани ҳокимининг қишлоқ ва сув хўжалиги бўйича ўринбосари бўлган.
