Ҳўрмузда яна кескинлик, Москва ва Киевда янги музокаралар – кун дайжести

Бу вазият жаҳон нефт бозори учун жиддий хавф туғдирмоқда. Душанба куни нефт нархлари АҚШ ва Эрон ўртасидаги янги тўқнашувлар фонида яна ўсди.

Томонларнинг сўнгги ўзаро зарба алмашинувларидан сўнг Эрон парламенти спикери Муҳаммад Боқир Ғолибоф урушда «ўйин қоидалари» ўзгарганини айтиб чиқди.

У энди Эронга қарши ҳар қандай ҳужумга «янада тезкор, қаттиқ ва оғриқли жавоб» қайтарилиши, АҚШ «ҳужумларга симметрик жавоб қайтариш даври» тугаганини тушуниши лозимлиги, Эроннинг АҚШ ҳарбий базаларига берган сўнгги зарбалари «фақат бошланиши» эканини таъкидлаган.

АҚШ қуролли кучлари марказий қўмондонлиги раҳбари, адмирал Брэд Купер ҳам АҚШ ўз тактикасини ўзгартираётганини маълум қилди.

«Агар сиз бизнинг икки кемамизга ўқ узсангиз, биз учта кемангизни “ўчириб”, сизни янада катта иқтисодий бадал тўлашга мажбур қиламиз», деган у.

Индонезияда вулқон отилди

Ўтган ҳафта охирида Индонезияда Анак-Кракатау вулқони уйғонди.

Ява ва Суматра ороллари ўртасидаги Сунда бўғозида жойлашган вулқондаги фаоллик мамлакатда ҳаво кенглигидаги қатновларга жиддий таъсир кўрсатди. Жакартадаги Сукарно-Хатта аэропорти фаолияти вақтинча тўхтатилиб, ўн минглаб одам аэропортда қолиб кетган.

Мамлакатдаги бошқа бир неча аэропорт фаолияти ҳам чекланган ва юзлаб рейслар бекор қилинган. Ассошиэйтед Пресс маълумотларига кўра, парвозлар билан боғлиқ узилишлар тахминан 170 минг йўловчига таъсир кўрсатган.

Ҳозирча қурбонлар ҳақида маълумот йўқ. Маҳаллий расмийлар аҳоли ва сайёҳларни вулқон кратеридан камида 3 километр узоқликда бўлишга чақирган. Соғлиқни сақлаш вазирлиги тиббий ниқоблардан фойдаланишни тавсия қилмоқда.

Майамида авиаҳалокат

АҚШнинг Флорида штати Майами шаҳридаги халқаро аэропортда Boeing 767 русумли юк самолёти қўниш вақтида ҳалокатга учради. Самолёт учиш-қўниш йўлагидан чиқиб кетиши оқибатида 5 киши ҳалок бўлиб, яна 5 киши жароҳатланган. Жароҳатланганлардан уч нафари оғир аҳволда.

21 Air авиакомпаниясига тегишли бўлган ушбу самолёт йирик логистика комплекси олдидаги автотураргоҳда турган автомобилларга бориб урилган. Воқеа жойида ёнғин рўй берган, айрим жабрланувчилар автомобилларидан чиқа олмай қолишган.

Ушбу ҳодисадан сўнг аэропорт ёпилган, натижада кўплаб рейслар кечиктирилган ёки бекор қилинган. Кейинчалик аэропорт ўз фаолиятини тиклади, бироқ йўловчилар эҳтимолий кечикишлар ҳақида огоҳлантирилган.

Ҳалокат сабаблари бўйича текширув ишлари бошланган.

Непалда омон қолганлар

Непалда вайронкор сув тошқинидан кейинги тўққизинчи ва ўнинчи кунларда жами тўрт киши тирик ҳолда топилди.

Ҳодиса вақтида «Тришули 3А» гидроэлектр станцияси туннелларида юзлаб кишилар қамалиб қолганди. Қутқарувчилар туннеллардан бирининг кириш жойини очиш учун 6 кунга яқин вақт сарфлаган. Дастлаб 4 сентябр куни туннелга кириш жойидан тахминан 170 метр масофадан икки ишчи тирик ҳолда топилганди. Жабрланувчилар Катмандудаги ҳарбий ҳоспиталга етказилган. Қутқарувчилар уларнинг ёнида яна бир кишининг жасадини ҳам аниқлаган.

Кейинги куни эса туннел кириш жойидан 225 метр масофада Хитой фуқароси бўлган яна бир ишчи тирик ҳолда топилди.

Шунингдек, қутқарувчилар 5 сентябр куни Нувакот туманидаги ўз уйи харобалари остида ётган 60 ёшлардаги аёлни топган. Аёлга биринчи тиббий ёрдам кўрсатилиб, вертолёт орқали пойтахт Катманду шаҳридаги шифохонага олиб кетилган.

Эслатиб ўтамиз, 26 август куни Непал ва Хитой чегарасидаги тоғли ҳудудда кўчки рўй берганди, шундан кейин Тришули дарёси водийси бўйлаб лой, тош ва сув аралаш кучли сел оқиб келган. Табиий офат уйларни, йўлларни, кўприкларни ва энергетика инфратузилмаси объектларини вайрон қилган. Сўнгги маълумотларга кўра, қурбонлар сони 1344 нафарга етган, 5 мингга яқин киши бедарак йўқолган деб ҳисобланмоқда. Табиий офат етказган зарар 2,56 миллиард долларга баҳоланмоқда.