Россия аэропортларида самолётларга ёнилғи қуйиш бўйича чекловлар оммавий равишда жорий этилмоқда. “Верстка” нашри аэронавигация ахборот тизими маълумотларига таяниб ёзишича, 7 сентябр ҳолатига кўра, бундай чоралар мамлакатнинг камида 26 та йирик аэропортида амал қилмоқда.
Нашр маълумотларига кўра, дастлабки чекловлар июн ойида жорий этилган, уларнинг иккинчи тўлқини эса сентябрга тўғри келган. Чекловларнинг амал қилиш муддати аэропортга қараб бир ойдан қарийб етти ойгача белгиланган.
Хусусан, Санкт-Петербургдаги Пулково аэропортида 2 сентябрдан 2027 йил 16 мартга қадар самолётларга фақат парвоз режасида кўрсатилган ҳажмда ёнилғи қуйишга рухсат берилган. Қўшимча ёнилғи олиш имконияти чекланган.
Калининграддаги Храброво аэропортида ҳам шунга ўхшаш тартиб 8 июндан 6 декабрга қадар амал қилади. Ушбу икки аэропортда чекловлар Россия ва хорижий авиакомпанияларга бирдек татбиқ этилади.
26 та аэропортнинг 15 тасида эса чоралар фақат хорижий авиакомпанияларга тегишли. Учувчилар учун эълон қилинган NOTAM хабарларида хорижий авиакомпаниялар самолётларига фақат битта парвозни амалга ошириш учун зарур бўлган миқдорда ёнилғи қуйилиши кўрсатилган.
Бундай чекловлар Қозон, Уфа, Перм, Екатеринбург, Челябинск, Тюмен, Иркутск, Владивосток, Хабаровск ва Якутск каби шаҳарлар аэропортларида амал қилмоқда. Уфада мунтазам бўлмаган рейсларни бажарадиган самолётларга ёнилғи қуйиш ҳам чекланган.
“Верстка”га кўра, авиаёнилғи билан боғлиқ энг мураккаб вазият Россия жанубида кузатилмоқда. Ҳозир ишлаётган олтита аэропортдан Сочи, Волгоград ва Астрахандаги чекловлар маҳаллий ва хорижий ташувчиларга бирдек тааллуқли. Краснодар, Минералние Води ва Владикавказ аэропортларида эса чекловлар хорижий авиакомпаниялар учун жорий қилинган.
DW Россиядаги ёнилғи тақчиллигини Украина дронларининг нефтни қайта ишлаш заводларига зарбалари билан боғламоқда. Нашр маълумотларига кўра, йил бошидан бери Россия нефтни қайта ишлаш заводларига камида 70 марта зарба берилган.
Август охирига келиб Россияда бензин ишлаб чиқариш ҳажми ички истеъмолнинг тахминан 70 фоизига тенг бўлгани, кунлик тақчиллик эса 30 минг тоннага етгани хабар қилинган. Фақат август ойида камида еттита нефтни қайта ишлаш заводи тўлиқ ёки қисман ишини тўхтатган, мамлакатнинг 17 та ҳудудида ёнилғи сотиш бўйича чекловлар жорий этилган.
