Ўзбекистон Much Better Adventures халқаро туристик платформасининг Solo Travel Index 2026 рейтингида мустақил саёҳатчилар учун энг яхши бешта йўналиш қаторидан ўрин олди. Бу ҳақда “Дунё” ахборот агентлиги Kyiv Diplomatic журналига таяниб хабар берди.
Рейтингни тузишда мутахассислар 26 та мамлакатни бир қатор мезонлар бўйича баҳолаган. Улар орасида турларни брон қилиш тенденциялари, сайёҳларнинг шарҳлари, хавфсизлик даражаси, виза тартиби ва овқатланиш харажатлари бор.
Натижада Ўзбекистон Италия, Япония ва Португалия каби машҳур туристик давлатлар билан бир қатордан жой олган.
Рейтинг муаллифлари АҚШ фуқаролари учун 30 кунлик визасиз режим жорий этилганидан кейин америкалик сайёҳларнинг Ўзбекистонга қизиқиши ортганини ҳам қайд этган.
Мамлакатнинг асосий туристик устунликлари сифатида бой тарихий ва маданий мерос, ранг-баранг табиат ҳамда ривожланаётган сайёҳлик инфратузилмаси кўрсатилган.
Хусусан, ёлғиз саёҳат қилувчиларга Нурота тоғларидаги пиёда йўналишлар бўйлаб саёҳат қилиш, анъанавий ўтовларда тунаб қолиш, Қизилқум чўли орқали Айдаркўлга бориш тавсия этилган.
Шунингдек, Буюк ипак йўли тарихи билан боғлиқ Самарқанд, Бухоро ва бошқа қадимий шаҳарларнинг меъморий ва маданий мероси алоҳида эътироф этилган.
Ўзбекистон саёҳат харажатларининг нисбатан ҳамёнбоплиги билан ҳам ажралиб туради. Мамлакат аввалроқ Condé Nast Traveler талқини бўйича энг арзон туристик йўналишлар рўйхатига ҳам киритилган эди.
