8 сентябр куни Украина президенти Володимир Зеленский Норвегиянинг 89 ёшда вафот этган қироли Ҳаралд V дафн маросимида қатнашиш учун Молдова пойтахти Кишинёвдан Ослога учган, у ердан Исландия орқали Канадага йўл олган.
Молдова ва Норвегия расмийларига кўра, ўша куни дронлар ҳужуми хавфи туфайли Украина президенти рейси кечиктирилган.
Кишинёвдагилар Reuters агентлигига Молдова ҳаво ҳудуди дрон туфайли ёпилганини маълум қилган. Жами тўртта учиб кетувчи ва тўртта қўнувчи рейс бекор қилинган.
Норвегия бош вазири Йонас Гар Стёре маҳаллий NRK телеканалига шундай деган: «Унинг самолёти Молдовадан учиб кетаётганда дрон билан тўқнашишига сал қолди. Бу у тўқнашишга мажбур бўлган реаллик».
У дрон самолётга қанчалик яқин келгани бўйича аниқлик киритмаган.
Moldova Liberă нашри ёзишича, мамлакат ҳаво кенглигидаги дрон ҳақидаги сигнал соат 16:30 да олинган. Соат 17:20 дан ўтганида дрон Кишинёв аэропортидан тахминан 160 километр наридаги Ришканский райони Старие Михайлени қишлоғи ҳудудига қулаган. Шундан кейин чекловлар олиб ташланган ва Зеленскийнинг самолёти учиб кетган.
Ўз навбатида AFP агентлигининг Украина президенти офисидаги манбаси Норвегия бош вазирининг Зеленский самолёти дрон билан тўқнашишига бир бахя қолгани ҳақидаги баёнотини «муболаға» деб атаган. «Дрон Молдова ва Руминия ҳаво ҳудудига кирганида Молдовада тревога қилинди», – дея қайд этган агентлик суҳбатдоши.
Аммо Британиядаги Financial Times газетаси (нашр мухбири президент самолёти бортида бўлган) Норвегия бош вазирининг жиддий хавф тўғрисидаги сўзларини тасдиқлаб, бу россияликларнинг реактив двигателли, «шаҳид» типидаги дрони бўлганини айтган.
Украиналик расмийлардан бири аноним тарзда ушбу нашрга берган интервюсида дрон Украина президенти бортини нишонга учган ҳолда учган бўлиши мумкинлигини, чунки у самолётга етарлича яқин келганини айтган.
FT суҳбатдошларига кўра, Зеленский дронни уриб тушириш учун Украинанинг F-16 қирувчи самолётини ҳавога кўтаришни таклиф қилган. Хабарда Украина ҳукумати ҳодиса юзасидан текширув олиб бораётгани маълум қилинган.
Молдованинг АҚШдаги элчиси Владислав Кулминский CNN нашри билан суҳбатда 8 сентябр куни мамлакат ҳаво кенглигида дрон пайдо бўлиши «тасодиф эмаслиги»ни айтган. «Украина президенти самолёти аэропортда турган бир пайтда, реактив дронлар Молдова ҳудудига шунчаки кузатув мақсадида учиб кирганига ишонмаймиз», – деган Кулминский.
Молдова полицияси маълумотига кўра, дрон қулаган жойни ўрганган экспертлар бу Россиянинг «Геран» русумли дрони бўлганини тахмин қилишмоқда. РФ ҳодиса юзасидан муносабат билдирмади.
