Келаси ҳафта Ҳюстонда бўлиб ўтадиган G20 энергетика вазирлари йиғилишида Россия расмий вакили иштирок этади. Бу ҳақда жума куни Оқ уй вакили маълум қилди, деб ёзди Reuters.
«G20 Ministerial Meeting on Energy Abundance» деб номланган тадбир душанбадан чоршанбагача бўлиб ўтади. Унда Америка томонидан ички ишлар вазири Дуг Бургум, энергетика вазири Крис Райт ва Оқ уй вакили Жаррод Эйген иштирок этиши кутилмоқда. Вашингтон россиялик иштирокчининг исмини дарҳол ошкор қилмади. Йиғилишга Европа ва Осиёдан ҳам энергетика соҳаси расмийлари таклиф этилган.
Бу қисқа вақт ичида Россиянинг «Катта йигирматалик» форматларига қисман қайтаётганидан дарак берувчи иккинчи ишорадир. Август ойида АҚШ молия вазири Антон Силуановга 2022 йилда Украинада уруш бошланганидан буён илк бор Шимолий Каролинадаги G20 йиғилишида шахсан қатнашишга рухсат берганди.
Расман йиғилиш мавзуси – «энергетик мўл-кўллик». Аслида эса кун тартиби анча кескин. Европалик аудиторлар яқинда ЕИ Россия нефти ва газидан воз кечиш жараёни режалаштирилганидан секинроқ кетаётганини ҳамда қиш олдидан газ захиралари пастлигича қолаётганини тан олди. Шу билан бирга, Украинадаги уруш ва Эрон атрофидаги вазият туфайли бозорларни талваса босмоқда: АҚШда дизел ёқилғиси галлони 6 доллардан ошиб, рекорд ўрнатди, Ҳўрмуз бўғози нефт ва газ етказиб бериш учун амалда ёпилган, АҚШнинг ўзида эса маълумотлар марказлари қурилиши энергетика тизимига босим ўтказяпти.
Сиёсий муҳит ҳам таранг, деб ҳисобламоқда Reuters. Доналд Трамп яқинда Владимир Путин билан «аъло даражадаги» суҳбат ўтказгани ва Москванинг Украина бўйича келишув тузиш истаги борлиги ҳақида гапирганди. АҚШ, Украина ва Европа давлатлари разведкаси бу ниятларнинг жиддийлигига шубҳа билан қарамоқда. Айни вақтда, АҚШ Вакиллар палатаси, катта эҳтимол билан, Ҳюстон йиғилиши кунларида Россияга қарши янги санкциялар бўйича овоз беради. Қонун лойиҳасининг қабул қилиниши кафолатланмаган.
Трамп маъмуриятининг Украинадаги уруш бўйича Россияга қарши биринчи санкциялари 2025 йил октябр ойида жорий этилган бўлиб, «Роснефт» ва «Лукойл»га таъсир қилган эди.
Россия вакилининг G20 энергетика йўналишидаги йиғилишда иштирок этиши Вашингтоннинг санкциялар босимини олиб ташламаган ҳолда нефт ва газ бозорлари бўйича мулоқот каналини сақлаб қолишга уриниши ўлароқ кўрилмоқда.
