Германия канцлери ва Христиан-демократик иттифоқ раҳбари Фридрих Мерц 20 сентябр куни Мекленбург — Олд Померания ҳамда Берлинда ўтказилган сайловлар натижасини «ҳалокат» деб атади. У бу баёнотни консерваторлар тарихда илк бор мамлакат федерал ерларидан бирининг парламентида вакиллик қила олмаслиги маълум бўлишидан олдин айтган.
Мекленбург — Олд Померанияда ХДИ атиги 4,9 фоиз овоз тўплади. Ер парламенти — ландтагга кириш учун эса партия камида 5 фоиз овоз олиши керак эди.
Сайловда 38,2 фоиз овоз билан ультраўнг «Германия учун муқобил» партияси ғалаба қозонди. Қиёслаш учун, 2021 йилги сайловда партияни сайловчиларнинг 16,7 фоизи қўллаб-қувватлаган эди.
Иккинчи ўринни 35,5 фоиз овоз билан Германия социал-демократик партияси эгаллади. 2021 йилда унинг натижаси 39,6 фоизни ташкил этган. Сўл партия 6,5 фоиз, «Иттифоқ-90/Яшиллар» эса 5,7 фоиз овоз олди. Қолган сиёсий кучлар беш фоизлик тўсиқдан ўта олмади.
Шу тариқа, 2021 йилги сайловда ҳам қатнашган партиялар орасида фақат «Германия учун муқобил» ўз натижасини яхшилаган. Бироқ партиянинг бу ғалабаси кўпроқ рамзий аҳамиятга эга. Чунки бошқа партиялар ультраўнглар билан коалиция тузишни рад этмоқда.
Федерал ер ҳукумати раҳбари, социал-демократ Мануэла Швезиг ўз сайловолди кампаниясини асосан «Германия учун муқобил»га қарши кураш ғояси устига қурган эди. Унинг ташвиқот шиорларидан бири «Аёл кўкларга қарши» бўлди. Кўк ранг ултраўнг партиянинг рамзий ранги ҳисобланади.
Швезиг сайлов куни ZDF телеканалига берган интервюсида ултраўнглар обрўси ошишининг икки асосий сабабини кўрсатди. Унинг сўзларига кўра, Мекленбург — Олд Померания аҳолисининг катта қисми Украинага молиявий ва ҳарбий ёрдам кўрсатилишига қарши. Шунингдек, кўпчилик «Шимолий оқим» қувури орқали Россия газини етказиб беришни қайта тиклашни хоҳлайди.
«Германия учун муқобил» партияси сайловолди кампаниясида айнан шу икки масаладан фаол фойдаланган. Швезиг социал-демократлар бу позицияларни қўллаб-қувватламаслигини ва шу сабабли овоз йўқотишини олдиндан тушунганини айтди.
Шунга қарамай, Швезигнинг стратегияси иш берди. Ой бошидаги сўровларда социал-демократларнинг рейтинги 30 фоиздан паст, бир йил аввал эса ҳатто 20 фоизга етмаган эди. Якуний 35,5 фоизлик натижа партияга Сўл партия ва «Яшиллар» билан биргаликда ҳукумат тузиш имконини бермоқда.
