«Новая газета» ҳаммуассиси ва собиқ бош муҳаррири Дмитрий Муратов АҚШ президенти Доналд Трампнинг махсус вакили Стивен Уиткофф ҳамда президент куёви Жаред Кушнерга мурожаат қилди.
Муратов уларни Россия президенти Владимир Путин билан ўтказиладиган музокараларда россиялик сиёсий маҳбусларни озод қилиш масаласини кўтаришга чақирди.
Нобел мукофоти совриндори бу таклифни 19 сентябр куни CNN телеканали эфирида билдирган. Унинг фикрича, инсон ҳуқуқларига риоя этилиши ва кенг кўламли халқаро тўқнашув хавфи бир-бири билан бевосита боғлиқ.
Муратов Уиткофф Кремлдаги навбатдаги учрашувдан кейин АҚШга қайтаётганда озод қилинган бир неча маҳбусни самолётида олиб кетиши мумкинлигини айтди.
«Нега у яхши муносабатларга эга бўлган жаноб Путиндан бир нечта сиёсий маҳбусни озод қилишни сўрай олмайди?» — деди у.
Муратовнинг таъкидлашича, Уиткоффнинг самолёти Москвадаги музокаралардан кейин одатда йўловчиларсиз АҚШга қайтади. Журналист Америка вакиллари дипломатик алоқаларидан инсонларни озод қилиш учун ҳам фойдаланиши керак, деб ҳисоблайди.
Беларусда 25 нафар маҳбус озод қилинди
Муратов мисол сифатида АҚШнинг махсус вакили Жон Коулнинг Беларус раҳбари Александр Лукашенко билан олиб бораётган музокараларини келтирди.
Коул билан 16 сентябр куни ўтказилган навбатдаги учрашувдан кейин Беларус колонияларидан яна 25 нафар сиёсий маҳбус озод қилинган. Бунинг эвазига АҚШ Беларуснинг икки корхонасига нисбатан жорий этилган санкцияларни бекор қилган.
Муратовнинг фикрича, маҳбусларни озод қилиш бўйича шунга ўхшаш музокараларни Россия билан ҳам олиб бориш мумкин.
Уиткофф Москвага саккиз марта борган
Стивен Уиткофф ва Жаред Кушнер охирги марта 5 сентябр куни Кремлда Владимир Путин билан учрашган эди. Бу Уиткоффнинг Украинадаги урушни тугатиш имкониятларини муҳокама қилиш учун Москвага саккизинчи ташрифи бўлди.
Эртаси куни Америка вакиллари Полша орқали поездда Киевга бориб, Украина президенти Володимир Зеленский билан музокара ўтказди. Кейинчалик улар Полша орқали АҚШга қайтди.
