DW нашри TV Moldova телеканали маълумотларига таяниб хабар беришича, парламент тегишли қарорни 22 сентябр куни қабул қилган. Фавқулодда чораларни 54 депутат қўллаб-қувватлаган, 20 нафари қарши чиққан. Яна 22 депутат овоз беришда қатнашмаган.
Молдова бош вазири Василе Тофаннинг тушунтиришича, мамлакат бир қатор омиллар таъсирида энергия ва сув таъминоти инқирози хавфига дуч келган. Улар орасида Эрон ва Украинадаги урушлар, шунингдек, гидроэлектростанциялар ишига таъсир кўрсатган қурғоқчилик ҳам бор.
Газ ва ёнилғи нархларининг кўтарилиши билан бирга, Днестр дарёсида сув сатҳининг пасайиб бораётгани ҳам фавқулодда чоралар кўришга сабаб бўлган.
Ҳукуматга тезкор чора кўриш имконияти берилади
Қарор қабул қилинишидан бир кун аввал Молдова президенти Майя Санду Миллий хавфсизлик кенгаши йиғилиши якунлари ҳақида маълум қилган эди.
Унинг айтишича, кенгаш парламент, ҳукумат ва масъул идоралар билан келишилган ҳолда энергетика ва сув хўжалиги соҳаларида фавқулодда ҳолат жорий этишни тавсия қилган. Бу ҳукуматга фавқулодда вазиятларга тезкор жавоб бериш учун зарур чораларни қўллаш имконини бериши керак.
Санду Молдованинг энергия ресурслари импортига боғлиқлигини таъкидлаган. Шунингдек, жаҳонда бензин ва дизел ёнилғиси нархлари мисли кўрилмаган даражада юқори эканига эътибор қаратган.
Мамлакатда аввал ҳам фавқулодда режим амал қилган
Мақолада қайд этилишича, Молдованинг энергетика ва сув хўжалиги соҳаларида 28 июлдан буён ҳукумат эълон қилган юқори тайёргарлик режими амал қилмоқда.
Бундан аввал, март ойида ҳам энергетика соҳасида 60 кунлик фавқулодда ҳолат жорий этилган. Ўшанда бундай чора мамлакат электр таъминотида муҳим ўрин тутувчи Исакча — Вулканешти электр узатиш линияси узилиши билан боғлиқ бўлган.
