Дубайда дам олиш қанчага тушади?

Қишда ҳам дам олиш ёқимли, фақат сув совуқ туюлиши мумкин.

Пул тежаш учун ёз фаслини кўриб чиқиш мумкин. Юқори ҳарорат ва намлик сабабли сайёҳлар камаяди, меҳмонхоналар арзонлашади. Шу билан бирга, ёзда баъзи мавсумий кўнгилочар жойлар, масалан, Global Village ва Dubai Miracle Garden ишламайди, баъзан қум бўронлари ҳам кузатилади.

Яшаш қанчага тушади?

Дубайга сафарларимда одатда Two Seasons Hotel & Apartments меҳмонхонасида тураман. Бир ётоқхона, меҳмонхона ва мини-ошхонаси бор апартаментларни танлайман. Хонани меҳмонхонанинг расмий сайти ёки Booking.com каби брон қилиш сервислари орқали банд қилиш мумкин.

Сафарларимдан бирида шундай хона 10 кун учун 2650 долларга тушган. Плитаси бор худди шундай хона 300 долларга қимматроқ эди. Таққослаш учун: ёзда худди шу хона овқатланишсиз бир ҳафтага 700 доллар эди. Нарх мавсумга қараб ўзгаради.

Қайси туманда турган маъқул?

Туман танлаш дам олиш нархи ва кундалик транспорт харажатларига катта таъсир кўрсатади. Тежамкорлик қилишни истасангиз, Дейрада туришни маслаҳат берган бўлардим. У Дубайнинг арзон меҳмонхона, қаҳвахона ва дўконларни топиш осон бўлган энг арзон туманларидан бири.

Икки киши учун бир ҳафта яшашнинг тахминий нархлари:

Диққатга сазовор жойлар яқинида туришни истасангиз, Downtown Dubai ёки Dubai Marina яхши танлов, аммо у ерда яшаш қимматроқ.

Шаҳарда ҳаракатланиш

Агар шаҳар бўйлаб кўп юриш ёки унинг ташқарисига чиқишни режалаштирсангиз, автомобил ижарага олган маъқул. Kia Rio ёки MG 3 каби кичик автомобилни бир ҳафтага ёнилғи харажатини ҳисобга олмаганда 80–90 долларга топиш мумкин. БААда автони ижарага олиш ҳақида алоҳида мақолада айтилган.

Агар бу вариант тўғри келмаса, метро ва автобуслардан фойдаланиш қулай. Менимча, бу Дубайда ҳаракатланиш учун энг арзон усуллардан бири.

Метро

Метро ва автобусларда юриш учун Nol кумуш картасини расмийлаштиришни маслаҳат бераман. У билан юриш бир марталик чипталар сотиб олишдан кўра арзонроқ тушади.

Йўлкира нархи кесиб ўтиладиган ҳудудлар сонига боғлиқ. Масалан, Dubai Internet City станциясидан Burj Khalifa/Dubai Mall станциясигача бир марталик чипта 11 $ туради, Nol картаси билан эса — 5 $ атрофида.

Сафар нархи масофага боғлиқ. Дубай ҳудудларга бўлинган: агар бир ҳудуд ичида ҳаракатлансангиз, сафар арзонроқ тушади. Агар йўналиш бир нечта ҳудудлардан ўтса, нарх ошади. 

Nol Silver картаси орқали сафар қиймати

Картани автоматлар, метро станцияларидаги кассалар ва Nol Pay иловаси орқали сотиб олиш ва тўлдириш мумкин. Картада камида 7,5 дирҳам ($2) пул туриши керак.

Такси

Бир неча километрлик қисқа сафар ҳам 8-10 долларга тушиши мумкин.

Такси чақириш учун одатда Careem иловасидан фойдаланаман: илова орқали буюртма берилганида Илова орқали чақирилганда чиқиш ҳақи 2,72 доллар, кўчада тўхтатилганда эса 2,18 доллар атрофида бўлади. Аэропортдан сафар қилиш қимматроқ.

Ортиқча тўламаслик учун маршрутни олдиндан навигаторда текшириб олинг ва ҳайдовчи айланма йўлдан юрмаётганини кузатиб туринг.

Овқатланиш қанчага тушади?

Дубайда овқатланишга кўп пул кетади: қаҳвахоналар арзон эмас, ресторанлар қиммат.

Бир сафар L'ETO қаҳвахонасига кирдик. Икки порция «Цезар» салати, қаҳва ва чой икки кишига 300 дирҳамга (82 $) тушган. Шу тармоқнинг бошқа филиалида эса айнан шундай буюртма 150 дирҳам (41 $) бўлган. Тажрибамдан кўрдимки, ҳатто бир тармоққа тегишли муассасаларда ҳам нархлар анча фарқ қилиши мумкин.

Овқатланишда пул тежаш учун Fresh Food каби йирик супермаркетлардан тайёр таомларни сотиб олиш мумкин. У ерда мунтазам равишда «биттанинг нархига иккита» акциялари бўлади, тайёр овқатни эса ўша ернинг ўзида иситиб олиш мумкин. Бундан ташқари, кўп супермаркетларда кичик қаҳвахоналар бўлиб, бу ерда овқатланиш арзон тушади.

Овқатланиш нархи

* Муассаса ва буюртмага қараб.

Кўнгилочар жойлар

Меҳмонхоналардаги гидлардан экскурсия сотиб олмайман: улар қиммат. Чипта ва экскурсияларни расмий сайтлар ёки брон қилиш хизматлари орқали олдиндан сотиб олган маъқул.

Burj Khalifa

Burj Khalifa'нинг 124 ва 125-қаватларига чиқиш бир киши учун 50–70 доллар туради.

Агар мустақил боришни режалаштирсангиз, чиптани олдиндан брон қилиш арзонроққа тушади.

Аквапарклар

Atlantis меҳмонхонасидаги Aquaventure ва Wild Wadi аквапаркларини тавсия қиламан. Aquaventure чиптаси бир киши учун 54 доллардан бошланади. Lost World Aquarium’га кириш билан биргаликдаги чипта эса 60 доллардан. Нарх мавсум ва танланган тарифга боғлиқ, шунинг учун саёҳатдан олдин нархларни текшириб олган маъқул.  

Келажак музейи

Менга экспозициянинг бир қисмини бепул кўриш мумкинлиги ёқди. Барча залларга кириш учун эса чипта керак бўлади – нархи бир киши учун 46 доллар.

Dubai Aquarium

Dubai Mall'даги Dubai Aquarium уч қаватни эгаллаган, уни савдо марказининг ўзида бепул томоша қилиш мумкин. Қўшимча 264 доллар эвазига аквариумда дайвинг қилиш мумкин.

Навбатда туришни истамасангиз, юқори қаватга чиқинг. У ердан ҳам чиройли манзара намоён бўлади, одам унчалик кўп бўлмайди.

Саҳро бўйлаб сафари

Сафари танлаганингизда фақат арзонлигига қараб қолманг.

Агар экскурсия 25 доллар атрофида бўлса, овқатланиш, шоу ва ташкилотчилик сифати пастроқ бўлиши мумкин. Яхшиси, 40 доллардан юқори вариантларни танланг.

Dubai Miracle Garden

Дунёдаги энг катта гул паркларидан бири бўлган Dubai Miracle Garden жуда ёқди. Бу ерда ўн миллионлаб гуллар, ғаройиб композициялар, гул инсталляциялари ва капалаклар боғини кўриш мумкин.

Чипта расмий сайтда 25, кассада 27 доллар туради.

Нималарни бепул кўриш мумкин?

Дубайда бепул кўриш мумкин бўлган жойлар ҳам кўп.

Пляжлардан Kite Beach ва Open Beach кўпроқ ёқди. Иккаласига ҳам кириш бепул. Яна бир яхши вариант — La Mer. У ҳам бепул, лекин одам кўп.

Dubai Marina Walk ва Bluewaters соҳили бўйлаб сайр қилиш, кечки пайт эса Burj Khalifa ёнида фонтанлар шоусини томоша қилиш мумкин. Келажак музейида ҳам бепул ҳудуд бор.

Аёллар ва болалар ҳамроҳингиз бўлса, аёллар куни ўтказиладиган муниципал пляжларга эътибор қаратиш мумкин. Бундай кунларда кириш 10 $ атрофида бўлади, бу пляжларга фақат аёллар ва болалар кириши мумкин.

Дубайдаги бепул жойлар

●      Kite Beach

●      Open Beach

●      La Mer

●      Burj Khalifa фонтанлар шоуси

●      Dubai Marina Walk

●      Bluewaters

●      Келажак музейидаги бепул ҳудуд

Дубайда нима сотиб олган яхши?

Мен Дубайдан кўпинча техника, заргарлик буюмлари, атирлар ва хушбўй мойлар олиб келаман.  

Бир сафар Ўзбекистондагидан 500 доллар арзонроққа телефон сотиб олганман. Аксар туристлар уйларига телевизор, ўйин приставкалари ва бошқа электроника буюмлари билан қайтишларига кўп кўзим тушган.

Заргарлик буюмлари сотиб олмоқчи бўлсангиз, Дейрадаги тилла бозорига боришни тавсия қиламан. Бу ердаги нархлар бренд дўконлардагига нисбатан анча арзон. Масалан, 100 долларга тилла зирак сотиб олганман.

Араб мойли атирлари ҳам энг яхши деб ҳисобланади. Ҳажми 6 мл бўлган флакон 16–18 дирҳам ($4,5–5) туради. Ҳажми 100 мл бўлган француз атирини 100 $ га олгандим.

Агар саёҳат Рамазон ойига тўғри келса, шопинг учун вақт ажратинг. Бу даврда кўплаб савдо марказларида нархлар арзонлашади, айрим меҳмонхоналар эса савдо марказларига бепул трансферлар ташкил қилади.

Қандай харажатларни ҳисобга олиш керак ва қандай тежаш мумкин?

Сафарни режалаштиришда нафақат авиачипта ва яшаш харажатларини, балки қўшимча сарф-харажатларни ҳам ҳисобга олиш зарур.

Мен учун энг нохуш кутилмаган харажатлардан бири туристик йиғим бўлган. Илк сафарларимдан бирида у кунига 17 долларни ташкил этган ва меҳмонхона нархидан алоҳида тўланган.

Мен кутмаган яна бир харажат — меҳмонхона депозити эди. Тўрт юлдузли меҳмонхоналардан бирига жойлашиш пайтида 500–600 дирҳам (136–163 доллар) депозит қўйишимга тўғри келган. Чиқиш вақтида хонага нисбатан ҳеч қандай эътироз бўлмагани учун пул тўлиқ қайтарилган.

Айрим хусусий пляжлар ҳам қўшимча харажат талаб қилиши мумкин. Масалан, битта шезлонгни ижарага олиш 100 доллар атрофида, соябон учун эса алоҳида пул тўланади.

Сафарларим давомида дам олиш сифатига зарар етказмасдан айрим харажатларни камайтириш мумкинлигини билдим. Бунинг учун::

●      ёз фаслини танлаш керак, бу пайтда яшаш арзонроқ бўлади;

●      такси ўрнига жамоат транспорти ва Nol картасидан фойдаланиш керак;

●      экскурсияларни меҳмонхона гидларидан эмас, мустақил сотиб олиш керак;

●      тайёр таомларни кўпинча «битта нархига иккита» акциялари ўтказиладиган супермаркетлардан сотиб олиш керак;

●      шопингни кўплаб дўконларда катта чегирмалар бўладиган Рамазон ойига режалаштириш.

Қанча пул билан бориш керак

Саккиз марталик сафарим давомида якуний бюджет мавсум, меҳмонхона тоифаси, дам олиш шакли ҳамда кўнгилочар тадбирлар ва шопинг учун қанча маблағ сарфлашингизга боғлиқ бўлишига ишонч ҳосил қилдим. Агар авиачипта, яшаш, овқатланиш, транспорт ва бошқа асосий харажатларни ҳисобга олинса, қуйидаги суммаларни мўлжаллаш мумкин:

Сафар учун тахминий бюджет

* бунга парвоз, яшаш, транспорт, кўнгилочар машғулотлар ва саёҳат давомидаги бошқа асосий харажатлар киритилган.

Бу сумма қатъий эмас, балки тахминийдир. Якуний харажатлар мавсум, авиачипта нархи, меҳмонхона, дам олиш дастури ва харидлар ҳажмига боғлиқ бўлади.