Чиқиндиларни бошқариш ва циркуляр иқтисодиётни ривожлантириш агентлиги маълумотига кўра, қурилмалардан бири Экология қўмитаси биноси олдида, яна бири Сурхондарё вилояти марказида ўрнатилиб, фойдаланишга топширилган.
Ташаббус агентлик ҳамда Норвегиянинг чиқиндиларни автоматик йиғиш ва саралаш технологиялари соҳасида фаолият юритувчи TOMRA компанияси ҳамкорлигидаги пилот лойиҳа доирасида амалга оширилмоқда. Лойиҳа ичимлик идишларини алоҳида йиғиш ва қайта ишлашга топширишни рағбатлантиришга қаратилган.
Фандоматдан фойдаланган фуқаро икки вариантдан бирини танлаши мумкин. Биринчи вариантда қабул қилинган ҳар бир идиш учун 150 сўм унинг Click электрон ҳамёнига ўтказилади. Иккинчи вариантда эса маблағ хайрия мақсадлари ва дарахт экиш ташаббусларига йўналтирилади.
Агентликнинг билдиришича, лойиҳадан кўзланган мақсад чиқиндиларни саралашни кундалик одатга айлантириш ва аҳолининг экологик маданиятини оширишдир. Шунингдек, фойдаланилган ичимлик идишлари қайта ишланадиган ва иқтисодий қийматга эга ресурс эканини кўрсатиш мақсад қилинган.
Пилот лойиҳа ўзини оқласа, фандоматларни республиканинг бошқа ҳудудларидаги аҳоли гавжум жойларга ҳам босқичма-босқич ўрнатиш режалаштирилган.
