DW хабарига кўра, Гринкевич бу ҳақда 28 сентябр, душанба куни Европа парламентининг хавфсизлик ва мудофаа қўмитаси аъзолари олдидаги чиқишида гапирган.
Унинг таъкидлашича, Россиянинг Европа Иттифоқи давлатларида амалга ошираётган диверсиялари кўзланган натижани бермаган. Ушбу ҳаракатлардан мақсад Европа мамлакатларини қўрқитиш ва уларнинг Украинага ёрдамини тўхтатишга эришиш бўлган.
Шу билан бирга, Гринкевич бундай диверсиялар тобора «сурбет» тус олаётганини қайд этган. Мисол тариқасида у август бошида Лейпциг аэропортида портловчи модда ўрнатилган учувчисиз учиш аппарати топилгани ҳамда сентябр ўрталарида Россия фрегати Дания ҳарбий вертолёти томон сигнал ракеталарини отганини эсга олган.
«Булар қўрқув уйғотиш ва Украинани биргаликда қўллаб-қувватлашимизни издан чиқаришга уринишнинг яққол мисолларидир. Бу иш бермаяпти», — деган НАТО бош қўмондони.
У Дания билан боғлиқ ҳодисадан кейин Копенҳаген, аксинча, Киевга қўшимча ёрдам ажратганига эътибор қаратган.
«Агар мамлакатингиз гибрид ҳужумга учраса, Украинани қўллаб-қувватлаш борасидаги қатъиятни кучайтириш россияликларга уларнинг стратегияси иш бермаётганини кўрсатади ва эҳтимол, уларни бу стратегиядан воз кечишга мажбур қилади», — дея қўшимча қилган Гринкевич.
Москва масъулиятини очиқ кўрсатишга чақириқ
Гринкевичнинг фикрича, Россия томони амалга ошираётган диверсиялар ва вазиятни беқарорлаштиришга қаратилган бошқа ҳаракатларга энг самарали жавоб — улар учун Москвани очиқ айблаш ҳамда Украинага ёрдамни кучайтиришдир.
«Бу маълумотларни ошкор қилиш бундай ҳаракатларга ҳомийлик қилаётган давлатларга уларнинг қилмишларидан хабардор эканимизни англатади ва бундай операцияларнинг улар учун баҳосини оширади», — деган у.
Бош қўмондоннинг тушунтиришича, очиқ айбловлардан сўнг бундай давлатлар ўз тармоқлари самара бермаётганини ва хатти-ҳаракатларини ўзгартириши зарурлигини англайди. Унинг баҳосича, бунинг ўзи ҳам муайян тийиб турувчи таъсирга эга.
«Шарқий посбон» операциясининг натижалари
Гринкевич НАТОнинг «Шарқий посбон» — Eastern Sentry операцияси алянснинг шарқий чегаралари хавфсизлигига ижобий таъсир кўрсатганини ҳам айтган.
