Харитада 2025 йилда ҳар бир мамлакатнинг АҚШга товар экспорти ва ундан импорти йиғиндиси ялпи ички маҳсулотга нисбатан ҳисобланган. Хизматлар савдоси мазкур кўрсаткичга киритилмаган.
Маълумотлар АҚШ Аҳолини рўйхатга олиш бюроси, АҚШ Халқаро савдо комиссияси, Жаҳон савдо ташкилоти ва Халқаро валюта жамғармаси манбаларига асосланган.
Муҳим жиҳати: савдо ҳажмининг ЯИМга нисбати иқтисодиётнинг шунча қисми АҚШ ҳисобига яратилишини англатмайди. Бу кўрсаткич икки томонлама товар айирбошлаш кўламини мамлакат иқтисодиёти ҳажми билан таққослайди.
Мексика ва Канада: қўшни бозорнинг аҳамияти катта
Мексиканинг АҚШ билан товар савдоси унинг ЯИМга нисбатан 48 фоизни ташкил этган. Канадада бу кўрсаткич 31 фоизга тенг.
Улар иқтисодиёт ҳажми бир триллион доллардан ошадиган мамлакатлар орасида рейтингнинг биринчи ўнталигига кирган ягона икки давлатдир.
Канада учун энергетика савдоси алоҳида аҳамиятга эга. Мақолада келтирилишича, 2025 йилда мамлакат хом нефт экспортининг 90,1 фоизи АҚШ ҳиссасига тўғри келган.
Ветнам ва Тайван экспорти кескин ўсган
Ветнам ташқи савдога юқори даражада таянади: 2025 йилда унинг барча мамлакатлар билан экспорти ва импорти йиғиндиси ЯИМнинг 190 фоизига тенг бўлган.
АҚШ Ветнам товарлари учун энг йирик сотув бозоридир. Икки томонлама товар савдоси Ветнам ЯИМнинг 44 фоизига тенг. Йирик иқтисодиётлар орасида бу нисбат бўйича фақат Мексика олдинда.
2025 йилда Ветнамнинг АҚШга экспорти 28,1 фоизга ўсиб, 153 миллиард доллардан ошган. Бунда компютерлар ва электрон техника муҳим ўрин тутган. Мақолада бу ўсиш Америка компанияларининг ишлаб чиқариш занжирларида Хитойга боғлиқликни камайтириш ҳаракатлари билан ҳам изоҳланган.
Тайваннинг АҚШ билан товар савдоси эса ЯИМнинг 28 фоизига тенг. Унинг Америкага экспорти 2025 йилда 78 фоизга кўпайиб, 198,3 миллиард долларга етган.
Таиландда АҚШ билан савдонинг ЯИМга нисбати 20 фоиз, Малайзияда 19 фоизни ташкил этган. Ветнам, Тайван, Таиланд ва Малайзия глобал электроника таъминот занжирларининг муҳим марказлари ҳисобланади.
