Дунёнинг 1000 та шаҳрини қамраб олган тадқиқот асосида Visual Capitalist инфографика тайёрлаган. Ҳаёт сифати аҳоли жон бошига даромад, даромадлар тенгсизлиги, уй-жой харажатлари, кутилаётган умр давомийлиги, жиноятчилик даражаси ҳамда дам олиш ва маданий масканлардан фойдаланиш имкониятлари бўйича баҳоланган.
Канберранинг етакчилигига юқори иш ҳақи ва даромадлар ўртасидаги тафовутнинг нисбатан кичиклиги асосий омил бўлган. Шаҳарда давлат секторига тегишли барқарор ва яхши ҳақ тўланадиган иш ўринлари кўп.
Австралия пойтахти кутилаётган умр давомийлиги бўйича ҳам яхши натижалар қайд этган. Аҳоли сонига нисбатан дам олиш ва маданий масканларнинг кўплиги ҳам шаҳарнинг юқори баҳоланишига ҳисса қўшган.
Бироқ Канберра Global Cities Index’нинг барча йўналишларни қамраб олувчи умумий рейтингида 45-ўринда турибди. Яъни ҳаёт сифати бўйича етакчилик шаҳарнинг умумий рейтингда ҳам биринчи ўринни эгаллашини англатмайди.
Ҳаёт сифати бўйича юқори поғоналарда Европа шаҳарлари устунлик қилган. Улар орасида Норвегиянинг Берген ва Осло, Франциянинг Гренобл ҳамда Швейцариянинг Берн шаҳарлари бор.
Германиянинг беш шаҳри — Дрезден, Берлин, Мюнхен, Штутгарт ва Фрайбург-им-Брайсгау дастлабки 21 таликка кирган. Швейцариянинг Берн, Базел ва Цюрих шаҳарлари биринчи йигирматаликдан, Италиянинг Венеция, Падуя ва Генуя шаҳарлари эса биринчи ўттизталикдан жой олган.
Москва ҳаёт сифати бўйича 180-ўринни эгаллаган.
Европадан ташқарида Австралиянинг Канберра ва Сидней, АҚШнинг Сан-Хосе ва Сиэтл, Тайваннинг Синчжу ва Тайбэй шаҳарлари ҳамда Сингапур юқори натижалар кўрсатган.
Одатда яшаш учун жозибадор деб қараладиган айрим шаҳарлар эса биринчи ўттизталикка ҳам кира олмаган. Бунга, асосан, уй-жойнинг қимматлиги таъсир қилган.
Масалан, Дания пойтахти Копенҳаген умумий рейтингда 18-ўринда бўлса-да, ҳаёт сифати бўйича 160-поғонада қолган. Oxford Economics баҳосига кўра, уй-жой таклифининг чекланганлиги ва нархларнинг юқорилиги натижани пасайтирган. Айни пайтда шаҳар бошқарув сифати бўйича дунёда биринчи ўринни эгаллаган, атроф-муҳит ва иқтисодиёт йўналишларида ҳам кучли натижалар қайд этган.
Канаданинг Ванкувер шаҳрида ҳам шунга ўхшаш ҳолат кузатилган: у умумий рейтингда 24-ўринда, ҳаёт сифати бўйича эса 215-ўринда турибди. Фаол дам олиш учун ривожланган инфратузилма ва юқори умр давомийлигига қарамай, уй-жой харажатларининг жуда катталиги шаҳар баҳосини сезиларли пасайтирган.
