DW’нинг Bloomberg’га таяниб ёзишича, НАТО вакили ҳалок бўлган россиялик ҳарбийлар сони 28 минг нафаргача етганини айтган. Демак, 50 мингдан ортиқ йўқотиш ҳақидаги баҳо фақат қурбонларни эмас, яраланганларни ҳам қамраб олади.
Алянсдаги манба шу даврда Украина Қуролли кучлари йўқотишларини қарийб 5 минг киши деб кўрсатган. Бироқ келтирилган хабарда бу рақам фақат ҳалок бўлганларними ёки жароҳатланганларни ҳам қамраб олиши аниқлаштирилмаган.
Bloomberg Россия қўшинлари ҳужумда натижага эришиш учун ҳарбийларни «ўлим зоналари»га йўналтираётганини ёзган. Агентлик бу атама билан дронлар, ерга ўрнатилган миналар, артиллерия ва бошқа мудофаа воситалари кенг қўлланадиган ҳудудларни назарда тутган.
Материалда Россиянинг уруш харажатлари ҳам ортиб бораётгани қайд этилган. Bloomberg баҳосига кўра, 2026 йил якунида Москва ҳарбий харажатлари 17 триллион рублга — қарийб 178 миллиард еврога яқинлашиши кутилмоқда.
Бу Россия расмийлари 2025 йил охирида эълон қилган дастлабки кўрсаткичлардан тахминан 40 фоиз юқори.
Германия Федерал разведка хизмати — BND раҳбари Мартин Егер ўтган ҳафта урушнинг давом этиши Владимир Путин учун уни сиёсий йўқотишларсиз тўхтатишни қийинлаштираётганини айтган эди.
Аввалроқ, август ойида The Guardian Россиянинг бир ойлик ҳарбий йўқотишлари армияга янги жалб қилинаётганлар сонидан қарийб 6 минг нафарга кўп эканини хабар қилган.
Нашрга гапирган ғарблик амалдорлардан бири катта йўқотишларни янги ҳарбийлар жалб қилиш орқали қоплаш имкониятлари чекланганини таъкидлаган. Унинг фикрича, бу Россиянинг Украина фуқаролик инфратузилмасига ҳужумларни кучайтириш тактикасини қисман изоҳлайди.
Амалдор Москва қишда энергетика инфратузилмасини вайрон қилиш орқали украиналикларнинг руҳиятини синдиришга уринаётганини айтган.
