DW хабарига кўра, Зеленский 11 октябр кечқурун Telegram’да Харкив энергетика инфратузилмасига ҳужум қилинганини айтган.
«Ҳозиргина Харкив шаҳридаги ИЭМ-5га, Харкив энергетикасига зарба берилди», — деган Украина президенти.
Орадан тахминан бир соат ўтиб, у Харкив вилоятидаги энергетика объектларига ҳужум АҚШ президенти энергетикага зарбаларни тўхтатиш ҳақида эълон қилганидан кейин содир бўлганини алоҳида таъкидлаган.
Харкив вилояти ҳарбий маъмурияти раҳбари Олег Синегубов эса 11 октябр кечқурун шаҳар атрофига берилган ракета зарбасида уч киши ҳалок бўлгани ва яна 22 киши яраланганини хабар қилган.
Унинг маълумотига кўра, иккита кўп қаватли уй, битта хусусий хонадон, озиқ-овқат дўкони биноси ва бешта автомобил шикастланган. Бироқ Синегубов мазкур хабарида ИЭМга ҳужум ҳақида гапирмаган. Шу сабабли қурбонлар ва жароҳатланганларнинг айнан электр марказига берилган зарба билан боғлиқлиги хабарда аниқлаштирилмаган.
Маҳаллий «Харьков Info» Telegram-канали ҳам ИЭМга кечки ҳужум ҳақида ёзиб, ёнғин акс этган видеони эълон қилган. Канал муаллифларининг айтишича, тасвирларни маҳаллий аҳоли 11 октябр куни олган.
Шу куни Доналд Трамп Россия ва Украина «энергетик сулҳ»га рози бўлганини билдирган эди.
«Шу пайтдан бошлаб Россия ва Украина ўртасидаги урушда энергетик сулҳ жорий этилади. Ҳар икки томон бунга розилик берди. Уни бузманг!» — деб ёзган АҚШ президенти Truth Social’да.
Зеленский дастлаб Axios журналистига бундай қисман сулҳга эришилганидан хабари йўқлигини айтган. Бироқ Россия ҳам рози бўлса, ташаббусни қўллаб-қувватлашини билдирган.
Кейинроқ Украина президенти Киев Америка томонидан тафсилотларни кутаётганини маълум қилган. У Украина Қуролли кучлари барча буйруқларни олганини, энди АҚШнинг Россия билан мулоқотига оид аниқ маълумотлар ва Путиннинг Трамп айтган шартларни бажариши кутилаётганини таъкидлаган.
