Лойиҳа Hypercraft компаниясининг йўлтанламас Razorback машинаси, Forterra ишлаб чиққан AutoDrive автоном бошқарув тизими ҳамда 9 Mothers компаниясининг Edda турелини бирлаштиради.
Машина таъминот йўллари ўққа тутилаётган шароитда юк етказиш учун мўлжалланган. Бундай вазифаларни ҳайдовчисиз бажариш инсонларнинг бевосита хавф остида қолишини камайтиришга қаратилган.
Razorback — Юта штатининг Прово шаҳридаги Hypercraft компанияси ишлаб чиққан биринчи тўлиқ машина. Компания аввал тижорат транспорти учун электр куч қурилмаларини яратиш билан шуғулланган, кейинчалик мудофаа соҳасидаги ишланмаларни ҳам йўлга қўйган.
Машинанинг узунлиги тўрт метрдан ошади, юк кўтариш қуввати эса 1,8 тоннага етади. Hypercraft маълумотига кўра, унинг юриш захираси қарийб 800 километрни ташкил этади. Шунингдек, машина ташқи ускуналарни 38 киловаттгача электр қуввати билан таъминлай олади.
Конструкция вазифага қараб қўшимча датчиклар, радиостанциялар, қуроллар ва бошқа жиҳозларни ўрнатиш имконини беради. Razorback дастлабдан автоном ишлашга мўлжаллангани AutoDrive бошқарув тизимини ўрнатишни осонлаштирган.
Машинага ўрнатилган Edda турелининг оғирлиги тахминан 23 килограмм. У кичик дронларни парраклари овозидан аниқлайди, камералар ёрдамида кузатади ва сочма ўқли милтиқдан ўқ узади. Тизим 10 метрдан 100 метргача масофадаги дронларни нишонга олишга мўлжалланган.
Шу тариқа, янги платформа ҳарбий таъминотни автоном етказиб бериш ва дронларга қарши курашиш имкониятларини битта машинада жамлаган.
