Naked Science нашри танлов ғолиблари ва ҳакамлар юқори баҳолаган ишлардан сараланган суратларни тақдим этди. Уларда йиртқичларнинг ови, ҳайвонларнинг болаларига ғамхўрлиги ва табиатдаги кутилмаган учрашувлар акс этган.
Биринчи ўрин — «Ҳаёт учун кураш», Кевин Ши
Фотограф икки боласини боқаётган урғочи пумани бир неча кун кузатган. Тонгда йиртқич гуанакога секин яқинлашиб, ҳужумга ўтган. Пума ўлжасини йиқитиш ва бўйнидан тишлашга қайта-қайта уринган, аммо гуанако охир-оқибат қочиб қутулган.
Иккинчи ўрин — «Баланд тоғлар», Марко Гайотти
Суратда қуёш ботаётган пайтда Эфиопия тоғлигидаги қояда ўтирган гелада акс этган. Фақат Эфиопияда учрайдиган бу примат кўкрагидаги қизғиш доғи билан ажралиб туради. Унинг озуқаси деярли тўлиқ ўт-ўланлардан иборат.
Учинчи ўрин — «Уйқудаги гўзал», Феликс Беллуэн
Фотограф 2025 йил ёзида Шпицберген шимолидаги қалин Арктика музлари орасида сузаётган кемада бўлган. Узоқдаги муз ёнбағрида жунга ўхшаш бир нарсани кўриб, дрон учирган.
Яқинроқдан қаралганда, ёрқин мовий муз шакли ёнидаги чуқурчада ғужанак бўлиб ухлаётган оқ айиқ кўринган. Фотограф ҳайвонни безовта қилмаслик учун дронни баландда ушлаб, суратга олгач, узоқлашган.
«Боласи билан парвоз», Дуглас Гимези
Ҳакамлар юқори баҳолаган суратда Мелбурн яқинидаги дарахтлар орасида боласини кўтариб учаётган кулранг бошли учар тулки — йирик кўршапалак тасвирланган. Болалари оғирлашиб қолгунча онасига ёпишиб юради. Кейин эса дарахтларда бошқа болалар билан қолиб, оналарининг қайтишини кутади.
