Cadillac компанияси марканинг 125 йиллик юбилейига бағишланган Escalade йўлтанламасининг махсус версиясини тақдим этди. Америка бренди матбуот хизмати хабар беришича, янги автомобил Escalade-V модели негизида яратилган бўлиб, нархи 239 минг долларни ташкил этади.
Махсус йўлтанламас 252 нусхадан иборат чекланган ададда ишлаб чиқарилади. Дизайндаги асосий ўзгаришлар қаторидан кўк рангли тормоз суппортларига эга янги 24 дюймли ғилдирак дисклари, кузовнинг ташқи элементларидаги (радиатор панжараси, бамперлар ва ён ойналар) карбон қопламалар ҳамда остоналарнинг махсус ёриткичлари жой олган.
«Юбилей» йўлтанламасининг салони қора ва кулранг тусларда ишланган. Шунингдек, интерьерда бренднинг пойга моделларига ишора қилувчи кўк рангли урғулардан фойдаланилган. Масалан, хавфсизлик камарлари ва ўриндиқларнинг чокларида худди шундай ранг қўлланилган.
Янги модел 692 от кучига эга 6,2 литрли бензинли V8 двигатели билан жиҳозланган. Машина тўлиқ узатмали бўлиб, соатига 100 км тезликка 4,5 сонияда эришади.
