Bugatti Rimac компанияси бош директори Мате Римацнинг Bugatti Chiron Sport ҳиперкари Хорватиянинг Света-Неделя шаҳридаги компания бош қароргоҳи олдидаги автотураргоҳдан ўғирлаб кетилди.
Унинг сўзларига кўра, компания ҳудуди ўралмаган бўлиб, ташриф буюрувчилар бу ерга эркин кириши мумкин. Римац эса автомобил калитини доимо машинада қолдиради ва қулфламайди, чунки ходимлар автомобилни мунтазам равишда синовлар ва сафарлар учун олиб туришади.
Ўша куни компанияга 36 ёшли эркак иш излаб келган. У автотураргоҳда турган Chiron автомобилини кўриб, унга ўтирган ва ҳайдаб кетган. Орадан кўп ўтмай автомобил олиб қочилгани маълум бўлган. Римац зудлик билан полицияга қўнғироқ қилган.
Шундан сўнг ходимлар автомобилнинг ҳаракатини унга ўрнатилган телеметрия тизими орқали кузатиб боришган. Машина Словения томон йўл олган, кейин эса Австрия чегарасидан ўтган. Римац ўзининг Porsche 911 автомобилида уни таъқиб қилишга тушган. Қидирув ишларида Хорватия, Словения ва Австрия полицияси ҳам иштирок этган. Охир-оқибат Chiron Австриянинг Грац шаҳри яқинидаги ёнилғи қуйиш шохобчасида тўхтатилган.
Кейинроқ Римац машина ўғриси билан учрашиб, суҳбатлашган. У полицияга ариза бермасликка қарор қилган.
Автомобилнинг нархи 2,4 миллион евро туради.
