Демократлар номзоди Адам Ҳэмилтон Канзас штатида Сенат учун бўлиб ўтган сайловларда Республикачилар партияси номзоди, сенатор Рожер Маршаллни мағлуб этди.
Сўнгги ҳисоб-китобларга кўра, Ҳэмилтон 50,9 фоиз (556 414 киши), Маршалл эса 46,1 фоиз (503 230 киши) овоз олган. Либертариан партияси номзоди Дэвид Грэмга сайловчиларнинг 3 фоизи (32 934 киши) овоз берган.
«Раҳмат, Канзас. Менга билдирган ишончингиз ҳамда Вашингтонда сизнинг манфаатларингиз учун курашиш имкониятини берганингиз учун ташаккур. Тез орада яна кўришамиз», – деб ёзди Ҳэмилтон ўзининг X саҳифасида.
Сайловларда илк бор иштирок этган Ҳэмилтон Бирлашган методистлар черкови руҳонийси ва ёзувчи ҳисобланади. Кампания даврида у партиядаги келишмовчиликларни бартараф этишни ваъда қилганди.
Бу демократлар учун Канзас штатида Сенат учун сайловларда 1932 йилдан буён қозонилган илк ғалаба бўлди.
АҚШда барча сайлов участкалари ёпилган. Барча нашрлар демократлар Сенатда ҳам, Вакиллар палатасида ҳам кўпчиликни ташкил этиш учун етарли овоз тўплаганини эълон қилмоқда.
Хусусан, The New York Times нашрига кўра, Демократик партия Вакиллар палатасида 256 ўрин, сенатда эса 55 ўринга эга бўлади.
Демократлар Жоржия, Шимолий Каролина, Ню-Ҳэмпшир, Жанубий Каролина, Ню-Жерси, Массачусетс, Род-Айленд, Иллинойс, Делавэр, Ню-Мехико, Колорадо, Виржиния, Техас, Орегон, Оҳайо, Канзас, Айова, Миннесота, Мэн штатларида ғолиб чиққан.
Республикачилар Флорида, Ғарбий Виржиния, Вайоминг, Кентукки, Оклаҳома, Арканзас, Алабама, Теннесси, Жанубий Дакота, Луизиана, Айдаҳо штатларида устун келмоқда.
