NASA маълумотига кўра, X-59 самолёти 22, 24 ва 25 сентябр кунлари икки мартадан ҳавога кўтарилган. Шу тариқа, бир ҳафтадаги парвозлар сони аввалги рекорддан иккитага ошган.
Ушбу сериядан кейин самолётнинг жами синов парвозлари сони 38 тага етган.
Жадал синовлар X-59'нинг парвоз имкониятларини босқичма-босқич кенгайтириш дастури доирасида ўтказилмоқда. Мутахассислар самолётнинг турли тезлик, баландлик ва манёврларда ўзини қандай тутишини текширмоқда. Синов шароитлари аппарат келгусида ишлаши кўзда тутилган режимларга яқинлаштирилмоқда.
Парвозлардан бирида X-59 Мах 1,53 — соатига тахминан 1 625 километр тезликка эришган. Бу самолётнинг ҳозиргача қайд этилган энг юқори тезлигидир. Натижа унинг одатий парвозлари учун мўлжалланган Мах 1,4 крейсерлик тезлигидан ҳам юқори.
X-59 NASA'нинг Quesst миссияси доирасида синовдан ўтказилмоқда. Лойиҳанинг мақсади — товушдан тез учишда ҳосил бўладиган кучли зарб товушини анча юмшоқ товушга айлантириш технологиясини намойиш этиш.
Кейинги босқичларда самолётнинг аҳоли яшайдиган ҳудудлар устидан парвозларига одамлар қандай муносабат билдириши ўрганилади. Тўпланган маълумотлар қуруқлик устидаги тижорий товушдан тез парвозларга оид шовқин меъёрларини белгилашда фойдаланиш учун тақдим этилади.
Синовларга бой ҳафтадан сўнг X-59 режали техник хизматга юборилган. Бу жараён тахминан уч ҳафта давом этиши кутилмоқда.
Техник хизмат якунлангач, мутахассислар самолёт тизимларини навбатдаги текширувдан ўтказади. Шундан кейин жамоа парвозларни тиклаш ва жадал синов дастурини давом эттиришни режалаштирган.
